“Պետք է ձեւավորվի հարթակ, որը հնարավորություն կտա Արցախի ժողովրդին՝ ներկայանալու եւ քննարկելու իր իրավունքները”

«Շվեյցարիայի խորհրդարանի ստորին պալատը դեռեւս 2024 թվականի դեկտեմբերին ընդունել է բանաձեւ՝ Լեռնային Ղարաբաղի համար խաղաղության համաժողով անցկացնելու նպատակով։ Այդ բանաձեւի հիմնական ուղերձն այն է, որ Շվեյցարիայի խորհրդարանի ստորին պալատը համաձյան չէ այն ամենի հետ, ինչ կատարվել է Արցախի ժողովրդի հետ եւ գտնում է, որ Արցախի ժողովուրդը պետք է հնարավորություն ունենա լսված լինելու, պետք է ձեւավորվի հարթակ, որը հնարավորություն կտա Արցախի ժողովրդին՝ ներկայանալու եւ քննարկելու իր իրավունքները, այդ թվում՝ վերադարձի իրավունքը»,- այսօր Հայաստանում Շվեյցարիայի դեսպանատան մոտ ակցիայի ժամանակ ասաց Արցախի ՄԻՊ Գեղամ Ստեփանյանը։

Նա նշեց, որ այսօրվա հավաքի նպատակներից մեկը նաեւ այն է, որ արցախցիները խնդրանք են ուղղում Շվեյցարիայի խորհրդարանի վերին պալատի 46 պատգամավորներին։ Վերին պալատն այս տարվա մարտի 18-ին քննարկելու է նույն բանաձեւն ընդունելու հարցը։ «Եվ եթե այս պալատում եւս բանաձեւն ընդունվեց, ապա այն օրենքի ուժ է ստանում։ Եվ դրանից բխում է, որ Շվեյցարիայի կառավարությունը պետք է համապատասխան քայլեր ձեռնարկի՝ այդ բանաձեւում ամրագրված պարտավորությունները եւ պատասխանատվությունն ի կատար ածելու համար»,- ասաց Ստեփանյանը։

Գեղամ Ստեփանյանը հավելեց, որ ստորին պալատի կողմից ընդունված բանաձեւը Արցախի ժողովրդի համար հույսի եւ լույսի շող է։ «Եվ մենք խնդրում ենք, որ վերին պալատը եւս հավատարիմ մնա մարդու իրավունքների, հումանիզմի գաղափարներին եւ եւս կանաչ լույս վառի այդ բանաձեւի համար, կանգնի պատմության ճիշտ կողմում եւ իր քայլով եւս մեկ անգամ ապացուցի, որ Շվեյցարիայի նման պետությունը հաշտ չէ տեղի ունեցողի հետ, հաշտ չէ 150 հազար անձանց բռնի տեղահանության, էթնիկ զտման, նրանց պատմական ու մշակութային ժառանգության ոչնչացման, հայրենազրկման իրավիճակի հետ։ Եվ ոչ միայն հաշտ չէ, այլ նաեւ պատրաստ է ստանձնել պատասխանատվություն՝ այդ  անձանց իրավունքները պաշտպանելու համար»,- նշեց նա։