“Վերադառնալ հայրենիք, այնպիսի պայմաններում, որոնք կապահովեն մեր անվտանգությունը, կպաշտպանեն մեր իրավունքները եւ կապահովեն մեր արժանապատվությունը

Արցախի Ազգային ժողովի կողմից արցախցիների անունից այսօր նամակ փոխանցվեց Շվեյցարիայի իշխանությունների։ Արցախի ԱԺ նախագահի պարտականությունները կատարող Գագիկ Բաղունցը Հայաստանում Շվեյցարիայի դեսպանատան մոտ կազմակերպված հավաքի ժամանակ կարդաց նամակը։

Արցախցիները նամակում հույս են հայտնել, որ Շվեյցարիայի խորհրդարանի վերին պալատի կողմից եւս Արցախի հարցով խաղաղության համաժողով անցկացնելու բանաձեւը կընդունվի։

Ն.Գ. Դաշնային կանցլեր Իգնացիո Կասիսին

Արտաքին գործերի դաշնային դեպարտամենտ

Բեռն, Շվեյցարիա

Մարտի 13, 2025

Ձերդ Գերազանցություն,

Ես գրում եմ Ձեզ 150,000 հայերի անունից, ովքեր բռնի տեղահանվել ենք Լեռնային Ղարաբաղի մեր տներից և շարունակում ենք փափագել մեր հայրենիք վերադառնալու օրվա մասին: Ազգային խորհրդի կողմից 24.4259 համարի բանաձևի ընդունումը մեր ժողովրդին հույս է տվել, որ մեր նախնյաց հող վերադառնալը դեռևս հնարավոր է:

Նահանգների խորհրդի Արտաքին հարաբերությունների հանձնաժողովի հետագա հավանությունը ավելի է ամրապնդել այդ հույսը: Այժմ, երբ բանաձևը մոտենում է իր վերջնական փուլին, մենք նայում ենք Շվեյցարիային՝ այդ հույսը կենդանի պահելու համար:

Մենք հարգանքով խնդրում ենք Ձեզ չհակադրվել որոշմանը, երբ այն ներկայացվի Նահանգների խորհրդին 2025 թվականի մարտի 18-ին: Ձերդ Գերազանցություն, Լեռնային Ղարաբաղի ժողովրդի վերադարձի իրավունքը հիմնավորված է միջազգային իրավունքով և համընդհանուր ճանաչված մարդու իրավունքների նորմերով:

Ավելին, մեր իրավունքը հաստատվում է Արդարադատության միջազգային դատարանի 2023 թվականի նոյեմբերի 17-ի որոշմամբ, որը պարտավորեցրել է Ադրբեջանի Հանրապետությանը ապահովել Լեռնային Ղարաբաղից 2023 թվականի սեպտեմբերի 19-ից հետո բռնի տեղահանված անձանց «անվտանգ, անխոչընդոտ և արագ վերադարձը»:

Այն հետագայում ամրապնդվել է Եվրոպական խորհրդարանի երկու բանաձևերով, որոնք ընդունվել են 2024 թվականի մարտին և հոկտեմբերին, և երկուսն էլ ուղղակիորեն կոչ են անում Ադրբեջանին համագործակցել Լեռնային Ղարաբաղի ներկայացուցիչների հետ և երաշխավորել նրանց անվտանգ ու արժանապատիվ վերադարձը: Սակայն Ադրբեջանը շարունակում է անտեսել իր միջազգային պարտավորությունները և գործել անպատժելիորեն:

Այն ներկայումս Բաքվում կեղծ դատավարություններ է անցկացնում ապօրինաբար ձերբակալված հայ քաղաքացիների, ռազմագերիների և Լեռնային Ղարաբաղի ղեկավարների դեմ: Վերջերս այն հայտարարեց Բաքվում Կարմիր խաչի միջազգային կոմիտեի գրասենյակի փակման մասին: Լեռնային Ղարաբաղի ժողովուրդը հակամարտություն չի փնտրում:

Մենք փնտրում ենք միայն հնարավորություն՝ վերադառնալու մեր հայրենիք այնպիսի պայմաններում, որոնք կապահովեն մեր անվտանգությունը, կպաշտպանեն մեր իրավունքները և կպահպանեն մեր արժանապատվությունը:

Մենք խորապես հուսով ենք, որ Ձերդ Գերազանցությունը կաջակցի այս բանաձևի ընդունմանը, որն առաջարկում է երկխոսության և միջնորդության հարթակ՝ որպես Հայաստանի և Ադրբեջանի միջև արդարացի և տևական խաղաղության ուղղությամբ կարևոր քայլ:

Հարգանքով,

Գագիկ Բաղունց