Ոչինչ, եվրոպացի դիտորդները մեզ կհասկանան

ՀՀ ԱԳ նախարար Արարատ Միրզոյանն այսօր Ազգային ժողովում հայտարարեց, որ Ադրբեջանի հետ համաձայնեցված փաստաթուղթում «կան էական ձեռքբերումներ»։ Նա նշեց, որ այդ «ձեռքբերումներից» են տարածքային ամբողջականության փոխադարձ ճանաչումը, սահմանների անխախտելիությունը, իսկ ուժի կիառումը եւ ուժի կիրառման սպառնալիքն ուղղակի արգելված է այդ փաստաթղթով։ Նա շեշտեց, որ տարածքային ամբողջականությունը պետք է ճանաչվի Ալմա-Աթայի հռչակագրով։ Միրզոյանն ասաց, որ ամեն ինչ «փոխադարձության» սկզբունքով է։

Հարցին, թե ԵՄ դիտրոդներին հեռացնելու Ադրբեջանի պահանջը կա՞ այդ փաստաթղթում, նա պատասխանեց․ «Մենք համագործակցության ձեւերը քաղաքացիական առաքելության պարագայում միշտ էլ կարող ենք քննարկել եւ հանգել համաձայնությունների ԵՄ մեր գործընկերների հետ։ Դիտորդական առաքելությունը տեղակայվել է մեր առաջարկությամբ, մեր խնդրանքով։ Դիտորդական առաքելության նպատակն է ապահովել, նպաստել Հայաստանի եւ Ադրբեջանի միջեւ սահմանի կայանությանը։ Եվ պետք է արձանագրենք, որ տեղակայումից ի վեր իսկապես այս առաքելությունը ծառայել է այդ նպատակին, իսկապես առաքելությունը կայացած է։ Միեւնույն ժամանակ, երբ կստորագրվի այդ համաձայնագիրը, կվավերացվի ու ուժի մեջ կմտնի, բնականաբար, այդ կայունությունը եւ խաղաղությունը այլեւս շատ ինստիտուցիոնալ կդառնա Հայաստանի եւ Ադրբեջանի միջեւ։ Եվ այդ պարագայում մենք մեր ԵՄ գործընկերների հետ քաղաքացիական առաքելության հետ համագործակցության մասով ընդունելի, փոխշահավետ լուծումների կգանք»։