Ստամբուլի քաղաքապետ Էքրեմ Իմամօղլուն ձերբակալվել է
- 11:22 19.03.2025
Ստամբուլի ընդդիմադիր քաղաքապետ Էքրեմ Իմամօղլուն ձերբակալվել է կոռուպցիայի և կաշառակերության ցանցի գործով։ Այս մասին հայտնում են թուրքական լրատվամիջոցները՝ վկայակոչելով քաղաքի դատախազությանը։
Ավելի վաղ հաղորդվել էր, որ իրավապահները Ստամբուլում լայնածավալ գործողություն են սկսել, և ընդդիմադիր քաղաքապետ Էքրեմ Իմամօղլուին, նրա մամուլի քարտուղարին և ավելի քան 100 այլ անձանց, այդ թվում՝ պետական ծառայողների, քաղաքական ակտիվիստների, լրագրողների և գործարարների ձերբակալելու օրդեր են տրվել։
Իմամօղլուն, ում տունը խուզարկվել է, ոստիկանների ուղեկցությամբ բերվել է դատարան։
Ստամբուլում ընդդիմադիր քաղաքապետի ձերբակալության ֆոնին մինչև մարտի 23-ը արգելվել են հանրահավաքներն ու ցույցերը։
Ավելի վաղ հայտնի էր դարձել, որ Ստամբուլի համալսարանը որոշել է չեղյալ համարել Իմամօղլուի դիպլոմը՝ Թուրքիայի գլխավոր դատախազության համապատասխան խնդրանքով։ Այս որոշումը նրան խանգարում է առաջադրվել երկրի նախագահի պաշտոնում։