Հայաստանի «ռազմատենչ կառուցողականությունը». Բաքուն շոկի մեջ է

Արսեն Թորոսյանի խոսքով, Հայաստանը ջախջախիչ հարված հասցրեց Ադրբեջանին՝ միանգամից համաձայնելով «խաղաղության պայմանագրի» բոլոր պայմաններին։ Այժմ Բաքուն շոկի մեջ է և չգիտի, թե ինչ անել Հայաստանի «ռազմատենչ կառուցողականության» հետ. ինչպես արժանիորեն ձևակերպել հաղթանակը, եթե չկա դիմադրություն։ Կպարզվի, որ սա ոչ էլ հաղթանակ է:

Դատելով Արսեն Թորոսյանի խոսքերից՝ Հայաստանը պատրաստ է շարունակել շփոթեցնել Ալիեւին՝ նույն պահին համաձայնելով յուրաքանչյուր նոր պահանջի։ Իսկ պահանջներն աճում են։

Խոսքը, մասնավորապես, Տիգրանաշենը հանձնելու պահանջի մասին է, ինչը թույլ կտա Ալիևին այլևս չմտածել Մեղրիիմասին, քանի որ եթե Հայաստանը հանձնի Տիգրանաշենը, ապա Մեղրին կմնա Ադրբեջանի խորը թիկունքում, ինչպես Հայաստանի և Իրանի սահմանը։ «Զանգեզուրի» մայրուղին կանցնի Ջերմուկ-Երասխ-Մարգարա երթուղիով՝ բացառապես Բաքվի վերահսկողության տակ։

Միաժամանակ, ինչպես գրում են լրատվամիջոցները, Ալիևը պահանջում է Տավուշի գյուղերը, ինչպես նաև Հայաստան-Վրաստան մայրուղու մի մասը։

Ինչպես ԱԳ նախարար Արարատ Միրզոյանը հայտարարեց արտաքին հարաբերությունների խորհրդարանական հանձնաժողովի նիստում, խաղաղության պայմանագրի տեքստում Հայաստանի և Ադրբեջանի տարածքները նշված չեն։ Այնպես որ, Տիգրանաշենի և Տավուշի մի երկու գյուղերի հանձնումը ոչ մի «խախտում» չի լինի։

Սրանից հետո Ալիևը կհայտնվի մի վիճակում, որտեղ բժիշկ Արսեն Թորոսյանի շտապ օգնությունը կպահանջվի։