Ապրիլի 1-ից Ռուսաստանում․ եթե երեխան ռուսաց լեզվից քննությունը չհանձնեց, կզրկվի կրթությունից
- 12:43 02.04.2025
Ռուսաստանի Դաշնության դպրոցներում սովորելու համար այս տարվա ապրիլի մեկից միգրանտների երեխաներն անպայման պետք է քննություն հանձնեն ռուսաց լեզու առարկայից։ ՌԴ-ում փոփոխվել է միգրացիոն օրենսդրությունը, որն ուժի մեջ է մտել ապրիլի մեկից։ Այս մասին այսօր հրավիրած ասուլիսում ասաց «Հայկական Կարիտաս» կազմակերպության միգրացիոն ծրագրի փորձագետ Տաթեւիկ Բեժանյանը։
Նրա խոսքով՝ քննության շեմը չհաղթահարած երեխաները կզրկվեն կրթության իրավունքից։ Զուգահեռ ստուգելու են նաեւ երեխայի ծնողների եւ երեխայի՝ Ռուսաստանում գտնվելու օրինականությունը։
«Ապրիլի մեկից խիստ ստուգումներ են լինելու․ եթե երեխաների գրանցումը կեղծ է կամ գրանցման ժամկետը լրացել է, ապա պատժվելու են նաեւ ծնողները, անգամ հնարավոր է, որ ծնողներին ու երեխաներին արտաքսեն։ Արդեն գրանցվել են դեպքեր, երբ դպրոցում ստուգում անցկացնելիս պարզվել է, որ երեխան կամ չունի միգրացիոն հաշվառում, կամ կեղծ է փաստաթուղթը, եւ ծնողների հետ միասին երեխաներին տարել են օտարերկրացիների պահման վայր, այնտեղից էլ արտաքսել են։ Թեեւ ՌԴ օրենսդրությամբ երեխաներին իրավունք չունեն տանել այդ վայրը, բայց փաստորեն տանում են»,- նշեց նա։
Տաթեւիկ Բեժանյանը ՌԴ-ում գտնվող կամ մեկնել պատրաստվող հայերին խորհուրդ է տալիս ոչ մի դեպքում կեղծ միգրացիոն հաշվառում՝ ռեգիստրացիա չիրականացնել։ Նա խոսքով՝ կեղծ հաշվառումն ուղիղ տանելու է դեպի քրեական դաշտ, եւ եթե անգամ անձին քրեական պատժի չենթարկեն, ապա հաստատ կարտաքսեն։
Մյուս խորհուրդն այն է, որ նախքան ՌԴ մեկնելը երեխաներին ռուսաց լեզվի գիտելիքներ տան, որպեսզի պատրաստ լինեն այդ քննություններին։ Իսկ քննությունների անցողիկ շեմը հաղթահարելու համար միգրանտների երեխաները պետք է հարցերի 90 տոկոսին ճիշտ պատասխանեն։