Այլևս որեւէ օտարերկրացի չի կարող վարորդ աշխատել ՌԴ-ում՝ չունենալով Ռուսաստանի վարորդական իրավունք
- 18:22 02.04.2025
Այս տարվա ապրիլի մեկից Ռուսաստանում գտնվող օտարերկրացիներն այլեւս չեն կարող պարզեված կարգով փոխել իրենց վարորդական իրավունքի վկայականները, պետք է քննությու հանձնեն, որպեսզի ձեռք բերեն ՌԴ վարորդական իրավունք։ Այս մասին այսօր հրավիրած ասուլիսում ասաց «Հայկական Կարիտաս» կազմակերպության միգրացիոն ծրագրի փորձագետ Տաթեւիկ Բեժանյանը։
«Մինչեւ այս տարվա ապրիլի մեկը Ռուսաստանում բնակվելու իրավունք ու կացության կարգավիճակ ունեցող, երկքաղաքացի հանդիսացող օտարերկրացիներն իրավունք ունեին պարզեցված կարգով փոխել իրենց պետության վարորդական իրավունքի վկայականները ՌԴ վարորդական իրավունքի վկայականով՝ առանց քննություն հանձնելու։ Ապրիլի մեկից այլեւս այդ կարգը չի գործելու, եւ, որպեսզի ձեռք բերեն ՌԴ վարորդական իրավունք, այս անձինք պետք է քննություն հանձնեն։ Եվ այլեւս որեւէ օտարերկրացի չի կարող վարորդ աշխատել ՌԴ-ում՝ չունենալով Ռուսաստանի Դաշնության վարորդական իրավունք»,- ասաց Բեժանյանը։
Դա կհամարվի խախտում, մարդիկ կտուգանվեն։ Եվ եթե ոստիկաններն անձին այս խախտման համար երկու անգամ տուգանեն, սա հիմք է հանդիսանալու, որպեսզի այդ անձը մուտքի արգելք ստանա։
«Փետրվարի 5-ից խստացումները մեծ ծավալով ուժի մեջ են մտել, եւ ապրիլի մեկից ավելի դժվար է լինելու։ Օրենքը շատ հստակ ասում է՝ եթե անձը չունի ՌԴ կողմից տրամադրված վարորդական իրավունք, նա իրավունք չունի որպես վարորդ աշխատել։ Խախտումը հայտնաբերելու դեպքում անձը կարտաքսվի»,- հավելեց նա։