Sputnik. Ռուսաստանի նախագահ Վլադիմիր Պուտինը «Բալչուգ Կապիտալ» ՓԲԸ-ի սեփականատերեր Վարդան և Դավիթ Ամարյան եղբայրներին թույլատրել է ամերիկյան Goldman Sachs բանկային խմբից գնել «Գազպրոմի», «Ռոսնեֆտի» և ռուսական այլ ընկերությունների բաժնետոմսերը:
Բաժնետոմսերի ցուցակում են նաև «Ինտեր ՌԱՕ ԵԷՍ», «Նովատեկ», «Սուրգուտնեֆտեգազ», «Տատնեֆտ», «Լուկօյլ», «Նովոլիպեցկի մետալուրգիական կոմբինատ» (ՆԼՄԿ), «Ռոստելեկոմ» ընկերությունները:
Ռուսաստանի Դաշնության օրենսդրության համաձայն՝ այս գործողություններն իրականացնելու համար ընկերությանը լրացուցիչ թույլտվություններ պետք չեն:
«Բալչուգ Կապիտալի» գլխամասային գրասենյակը գտնվում է Երևանում: Հիմնադրամը կառավարում է ավելի քան 2 միլիարդ դոլար արժողությամբ ակտիվներ:
Դավիթ Ամարյանը նախկինում մի քանի տարի աշխատել է Ռուբեն Վարդանյանի հիմնադրած «Տրոյկա Դիալոգ» ներդրումային ընկերությունում: Goldman Sachs-ը աշխարհի խոշորագույն ներդրումային բանկերից մեկն է: 2022 թվականի մարտին, Ուկրաինայում հատուկ ռազմագործունեությունը սկսելուց հետո, բանկը ՌԴ-ում դադարեցրել է իր գործունեությունը։