Վաղը-մյուս օրը կարող է 300 հազար ադրբեջանցիներ գան Հայաստան եւ ավելի մեծ իրավունքներ ունենան, քան մենք ունենք
- 12:26 03.04.2025
«Գործ ունենք կոլաբորանտ իշխանության հետ, պետք է գնանք քաղաքական պայքարի պարտիզանական ճանապարհով»,- կառավարության շենքի մոտ այսօր բողոքի ակցիայի ժամանակ ասաց Արցախի Ազգային ժողովի պատգամավոր Արամայիս Աղաբեկյանը։
Նա նշեց, որ դիմադրություն պետք է լինի հայ ժողովրդի կողից, որպեսզի այս իշխանությունները չկարողանան իրենց ծրագրերը կյանքի կոչել։ Նա ասաց, որ այս իշխանություններն Արցախից հրաժարվել են, հիմա էլ արցախցիներից են հրաժարվում։
Ամեն ինչ անում են, որ մարդիկ արտագաղթեն Հայաստանից։ Սրա դեմ միակ պայքարը քաղաքական ինքնակազմակերպումը պետք է լինի, ասաց Աղաբեկյանը։
«Հարցը դրած է այնպես, որ եթե արցախցիների նկատմամբ այս վերաբերմունքը մարսվում է, վաղը կամ մյուս օրը ՀՀ բնակչության նկատմամբ է նման վերաբերմունք լինելու։ Վաղը-մյուս օրը կարող է 300 հազար ադրբեջանցիներ գան Հայաստան եւ ավելի մեծ իրավունքներ ունենան, քան մենք ունենք։ Եվ սա ես այնքան էլ անիրատեսական չեմ համարում, հիշենք, որ 2018 թվականին էլ մենք անիրատեսական էին համարում, որ Արցախը կարող էր հայաթափվել»,- ասաց Աղաբեկյանը։
«Պաշտոնական վիճակագրական թվեր են բերում, որ 14-15 հազար արցախցի է հեռացել Հայաստանից։ Արցախից 12 հազար զինվորական է տեղափոխվել ՀՀ, զինվորականների կողմից առաջարկ է եղել Հայաստանի իշխանություններին՝ քանի որ այս մարդիկ պատերազմով անցած են, որոշակի փորձառություն ունեն, եկեք ինտեգրում իրականացրեք, բայց դրանից էլ են հրաժարվել։ Այսինքն՝ եթե մենք գալիս ենք այն եզրակացության, որ Արցախից հրաժարվել են, հիմա էլ արցախցիներից են հրաժարվում, իմանանք մեր անելիքը, հասկանանք, թե ինչ պետք է անենք»,- հավելեց նա։