Ո՞նց թե Հայաստանում մարդկային ռեսուրսի ճգնաժամ է, բա արցախցինե՞րը
- 15:44 03.04.2025
«Եթե կարելի է վարորդ լինել՝ չիմանալով մեքենա քշել, ինչո՞ւ չի կարելի լինել կառավարիչ՝ չիմանալով կառավարել, ինչո՞ւ»,- ասաց Նիկոլ Փաշինյանն՝ ընդգծելով՝ կառավարությունը սխալ կադրային քաղաքականություն է վարում, որովհետև երկրում մարդկային ռեսուրսի ճգնաժամ է։
Նիկոլ Փաշինյանը «մարդկային ռեսուրս» ասելով, նկատի ունի կառավարությանը 100 տոկոսով հավատարիմ, տեղ-տեղ ցինիկ զանգված, որի մասնագիտական կարողությունները կարևոր չեն։
Եթե Փաշինյանը գնահատեր մարդկային ռեսուրսը, Արցախից բռնի տեղահանված մոտ 70 հազար աշխատունակ մարդու մասնագիտական կարողությունները չէին անտեսվի։ Արցախցի դատավորները խանութում «ախրանա» չէին աշխատի, բարձրակարգ զինվորականներ ու այլ ուժայինները տաքսի չէին քշի կամ ծառայության չէին ընդունվի ամենաստորին օղակներում։ Բժիշկներին, իրավաբաններին, տնտեսագետներին, արհեստավորներին չէին թողնի անգործ, պետական կառավարման մասնագետներին էլ չէին ասի, որ դուք այլ երկրի քաղծառայող եք, և մենք ձեզ չենք վստահում։
25 հազար արցախցի աշխատում է Հայաստանում, մնացածն էլ կաշխատեն, եթե նրանց «մարդկային ռեսուրսը» գնահատվի, եթե նրանց վստահն, գործի ընդունեն առանց վերապահումների, այլ ոչ թե ձևավորեն մարգինալ զանգված, որը կեռա-կեռա ու կպայթի։