Ինչո՞ւ արցախցիների նոր անձնագրերում նշվում է Ադրբեջան
- 19:15 03.04.2025
Փոխվարչապետ Տիգրան Խաչատրյանի հետ հանդիպման ժամանակ Արցախցիների իրավունքների պաշտպանության խորհրդի անդամները բարձրացրել են նաեւ հարցը, թե ՀՀ քաղաքացիություն ստացող արցախցիների անձնագրում ինչո՞ւ է նշվում Ադրբեջան։
Վերջին շրջանում արցախցիներն ահազանգում են, որ ՀՀ քաղաքացիություն ստանալիս իրենց անձնագրերում ծննդավայրը նշվում է Ադրբեջան։
Արցախցիների իրավունքների պաշտպանության խորհրդի անդամ Մարիամ Աբրահամյանն ասաց, որ կառավարությունում իրենց հետեւյալ պատասխանն են տվել․ «Հարցրեցի՝ երբ բռնի տեղահանվածը դիմում է ՀՀ քաղաքացիություն սանալու համար, ինչո՞ւ է անձնագրում նշվում Ադրբեջան։ Մեզ պատասխանեցին, որ կա ինչ-որ կառույց, որը կոչվում է ԻԿԱՕ, եւ Ադրբեջանի դիմել է այդ կառույցին։ Այսինքն՝ հայտ է ներկայացրել 2015 թվականին, սակայն բռնի տեղահանումից հետո է որոշվել, որ մեր անձնագրերում պետք է նշեն Ադրբեջան, այլապես իրենք ինչ-որ խնդիրներ են ունենում»։