Ազատության հրապարակում քննարկումների արդյունքում արցախցիները որոշեցին, որ պայքարը շարունակելու են
- 19:32 03.04.2025
Ազատության հրապարակում քննարկումների արդյունքում արցախցիները որոշեցին, որ պայքարը շարունակելու են եւ առաջիկայում հստակ գործողություններ պետք է իրականացնեն։
Քննարկումից հետո Արցախցիների իրավունքների պաշտպանության խորհրդի անդամ Անաստաս Իսրայելյանը հայտարարեց․ «Վաղը հայտարարություն կանենք, թե որ օրը եւ որ ժամին ինչ գործողություն ենք անելու։ Եկել ենք եզրակացության, որ մենք շարունակում ենք պայքարը, բայց բոլորդ պետք է զարթնեք ու համախմբված տեր կանգնեք մեր իրավունքներին»։
Նշենք, որ այսօր արցախցիներին կառավարությունում ընդունել էր փոխվարչապետ Տիգրան Խաչատրյանը։
Արցախցիների իրավունքների պաշտպանության խորհրդի կողմից մարտի 29-ին պահանջագիր էր ներկայացվել կառավարությանը։ Այսօրվա հանդիպման ժամանակ փոխվարչապետն ասել է, որ «40+10 հազար» ծրագրի մասով որոշումը չի վերանայվի, իսկ արցախցիների բարձրացրած քաղաքական ու իրավունքների հարցերին ընդհանրապես պատասխան չի տվել՝ ասելով, որ առաջիկա օրերին կառավարությունը գրավոր կպատասխանի այդ հարցերին։