“Խաղաղությունն” առանց հայերի է հնարավոր․ Սաղաթելյանը մոռացել է ռուս գեներալի խոսքերը

Աշխարհում մի սուբյեկտ կա, որը պարբերաբար հղում է անում 2023-ի սեպտեմբերին Արցախում ստորագրված, օրինական ուժ չունեցող փաստաթղթին. և այդ սուբյեկտն Ադրբեջանի ղեկավարությունը չէ։ Այս մասին Ֆեյսբուքի իր էջում գրել է «Հայաստան» խմբակցության պատգամավոր Իշխան Սաղաթելյանը:

Իշխան Սաղաթելյանը մոռանում է ևս մեկ սուբյեկտի, որը խոսում է այդ մասին՝ Ռուսաստանի։ Հենց ռուսական պետական ՌԻԱ Նովոստի գործակալությունն է 2024-ի հունվարի 1-ին ուրախ-ուրախ տեղեկություն է տարածել, որ «այսօրվանից» Լեռնային Ղարաբաղի հանրապետության լուծարման մասին հրամանագիրը ուժի մեջ է մտել։

Ռուսաստանը արել է իր գործը՝ ստիպել է արցախցիներին «լուծարվել» և լքել իրենց հազարամյա հայրենիքը։ Հետո, 2024-իապրիլին, երբ ռուսական զորքերն արդեն լքում էին Արցախը, ռուս գեներալը՝ դիմելով թուրք գործընկերոջն Ակնայում, ասել է, որ ռուսներին և թուրքերին «հաջողվել է խաղաղաություն հաստատել Ղարաբաղի տարածաշրջանում”։

Այդ առումով Ռուսաստանի քաղաքականությունը ամբողջությամբ համապատասխանում է «հայ-ադրբեջանական» կոնսենսուսին, որի մասին խոսում է Սաղաթելյանը։ Ավելին, դա հենց ռուսական պլանն է, որի շուրջ միավորվել են բոլորը․ խաղաղությունը կարող է լինել միայն առանց հայերի։ Հիմա նույն պլանը իրականացվում է մնացած Հայաստանում։

«Անգամ Ալիևն Արցախի օկուպացիայի, Արցախի հարցը վերջնական փակելու հարցերում հղում չի կատարում Արցախի պետական մարմինների լուծարման մասին ապօրինի փաստաթղթին», ասում է Սաղաթելյանը, նշելով․ «Ինչ վերաբերում է Արցախի հարցը փակելուն. դա ի զորու չէ անել որևէ մեկը։ Քանի կա Արցախի ժողովուրդը, որն ուզում է վերադառնալ իր տուն, կա նաև Արցախի հարցը, իսկ արցախահայերի իրավունքների պաշտպանությունը բոլորիս պարտականությունն է»,- գրել է նա:

Պարոն Սաղաթելյանը ևս մոռանում է, որ Արցախի ժողովուրդը եթե ուզենար առաջարկվող պայմաններում ապրել «Ադրբեջանի կազմում», չէր լքի իր հայրենիքը 1,5 տարի առաջ։ Պետք չէ խեղաթյուրել այն, ինչ ուզում էր Արցախի ժողովուրդը և ինչին հասել է 1988-ին՝ Արցախի վերամիավորումը Հայաստանի հետ։ Հենց վերամիավորման որոշման դեմ է Ալիևը, հենց դա է նա պահանջում բացառել ՀՀ Սահմանադրությունից, այլ ոչ թե 1988 թ․ վերամիավորման որոշմանն ի հակառակ հռչակած ԼՂՀ-ն։

Թե որքան էր Դաշնակցության և այլ հայկական կուսակցությունների մեղքը այս ամենի մեջ, դեռ կպարզվի։ Իսկ ՀՀ Կառավարությունն իր ԱԳՆ-ով պատասխան կտա փաստերը խեղաթյուրելու համար։