Թրամփը հայտարարեց Իրանի հետ ուղիղ բանակցությունների մասին

ԱՄՆ նախագահ Դոնալդ Թրամփը հայտարարել է, որ Վաշինգտոնը ուղիղ բանակցություններ է վարում Թեհրանի հետ։ «Մենք ուղիղ բանակցությունների մեջ ենք Իրանի հետ, և դրանք արդեն սկսվել են»,-ասել է նա լրագրողներին Սպիտակ տանը երկուշաբթի օրը՝ ապրիլի 7-ին, Իսրայելի վարչապետ Բենիամին Նեթանյահուի հետ հանդիպումից հետո։

Սպիտակ տան ղեկավարի խոսքով, հաջորդ շաբաթ օրը՝ ապրիլի 12-ին, նախատեսվում է «շատ կարևոր հանդիպում ուղղակիորեն, գործնականում ամենաբարձր մակարդակով»:

«Կարծում եմ՝ բոլորը համաձայն են, որ գործարքը նախընտրելի կլինի», – հավելել է Թրամփը։ Հակառակ դեպքում, եթե բանակցությունները ձախողվեն, նա Իրանին սպառնացել է «մեծ վտանգով»։ «Իրանը չի կարող միջուկային զենք ունենալ, և եթե բանակցությունները հաջող չանցնեն, կարծում եմ, շատ վատ օր կլինի Իրանի համար»,- ընդգծել է Սպիտակ տան ղեկավարը։

Թրամփը նշել է, որ Նեթանյահուի հետ հանդիպման ժամանակ քննարկել է Իրանի հարցը։

Իրանի արտգործնախարար Աբբաս Արաղչին հաստատել է Թեհրանի և Վաշինգտոնի միջև նախատեսված բանակցությունները՝ ընդգծելով դրանց անուղղակի բնույթը։ Հանդիպումը տեղի կունենա Օմանում և «որքան հնարավորություն է, որքան փորձություն», – պարզաբանել է նա։ «Գնդակը Ամերիկայի դաշտում է»,- գրել է Արաղչին X միկրոբլոգային ցանցում։