Սլովենիայի փոխվարչապետ․ Մենք սատարում ենք ՀՀ զինված ուժերին
- 14:06 16.04.2025
«Սլովենիան շատ հստակ եւ ուժեղ աջակցություն է ցուցաբերել Եվրոպական Խաղաղության հիմնադրամին, որպեսզի սատարենք Հայաստանի Զինված ուժերին»,- այս մասին այսօր Երեւանում կայացած մամուլի ասուլիսում ասաց Սլովենիայի փոխվարչապետ, արտաքին ու եվրոպական հարցերի նախարար Տանյա Ֆայոնը։
«Եվրոպական Խաղաղության հիմնադրամի աջակցության նախաձեռնությանը մենք սատարել ենք, որպեսզի Հայաստանի Զինված ուժերին սատարենք։ Պետք է միաձայն մոտեցում լինի, բայց ինչ վերաբերում է Սլովենիային, մենք շատ հստակ եւ ուժեղ աջակցություն ենք ցուցաբերել»,- հավելեց նա։
Նշենք, որ «Ազատություն» ռադիոկայանն արդեն հայտնել է, որ Ադրբեջանի նախագահի հետ սերտ հարաբերություններով հայտնի Հունգարիան, օգտվելով վետոյի իր իրավունքից, արդեն վեցերորդ շաբաթն է՝ արգելափակում է Եվրամիության Խաղաղության հիմնադրամից Հայաստանին 20 միլիոն եվրո հատկացնելու որոշումը։
Հայաստանի ԱԳ նախարար Արարատ Միզոյանն ասաց, որ քննարկումները շարունկավում են։ Նա հույս հայտնեց, որ ապագայում դրական հանգուցալուծում կլինի Հայաստանի տրամադրվելիք աջակցության հարցով։