Լիաննա Պետրոսյան․ արցախցիները դեմ են վրանը հանել՝ 2 ամիս 40 հազ․ օգնության դիմաց
- 18:02 17.04.2025
Lianna Petrosyan-ը հայտարարություն է տարածել․
Արցախցիների իրավունքների պաշտպանության խորհրդի հարգելի’ անդամներ,
Հիմքում ունենալով Արցախցիների իրավունքների պաշտպանության խորհրդի ս.թ. ապրիլի 15-ի հայտարարությունը՝ https://www.facebook.com/share/p/1G31ctz5Tk/?mibextid=wwXIfr, մասնավորապես, խնդրանք-հորդորը, որ բոլոր շահագրգիռ ու սրտացավ անձինք և կազմակերպությունների ներկայացուցիչներն առաջիկա օրերին ներկայացնեն իրենց դիտարկումներն ու առաջարկությունները՝
ես՝ որպես անձ, ով ավելի քան 1,5 տարի զբաղվում է Արցախից բռնի տեղահանված անձանց սոցիալ-իրավական խնդիրներով, որի ընթացքում որդեգրել եմ բաց եւ հրապարակային աշխատելաոճը, բարձրաձայնվող խնդիրների համար հնարավորինս լայն և հանրային ուսումնասիրությունների արդյունքներով առաջնորդվելը՝
ապրիլի 16-ին հանրային կարծիքի ուսումնասիրության նպատակով տեղադրել եմ հարցում https://www.facebook.com/share/p/1BMfTx1ZGB/?mibextid=wwXIfr
Հարցման արդյունքում ավելի քան 4100 անձ Ֆեյսբուքյան հարթակում և 3800 օգտատեր Տելեգրամյան ալիքում արտահայտել է իր կարծիքը. մասնավորապես, որ «Դեմ է» մարտի 29-ի հանրահավաքի արդյունքում Ազատության հրապարակում տեղադրված շտաբ-վրանի հեռացմանը՝ բնակվարձի աջակցության ծրագրի շահառու անձանց ևս երկու ամսով 40,000 աջակցություն տրամադրելու նախապայմանով։
Այս հարցումը հերթական անգամ ապացուցեց և վերահաստատեց, որ մեր տեղահանված հայրենակիցները, անկախ իրենց ծանր սոցիալ-տնտեսական և հոգեբանական վիճակից, պատրաստ չեն՝ ընդունելու ՀՀ Կառավարության «մանր առևտուրը», որովհետև վրանը՝ որպես ակցիայի միջոց, ի սկզբանե դրվել էր ավելի լայն խնդիրների լուծման հասնելու ակնկալիքներով։
Մարտի 29-ի հանրահավաքը և դրան հաջորդած միջոցառումներն ու զարգացումներն ապացուցեցին, որ այս ողջ ընթացքում իմ, ձեր և այլ անձանց ու միավորումների՝ որպես տեղահանվածների հարցերով շահագրգիռ կողմերի, ներկայացրած և վկայակոչած խնդիրներն իրական են, և մեր բոլորիս առաջարկությունները բխել են բացառապես տեղահանվածների իրական կարիքներից, այլ ոչ թե՝ ինչպես Կառավարության որոշ ներկայացուցիչներ են մեջբերել՝ անձերի կամայական ցանկություններից։
Եւ այս ողջ ընթացքում որևէ մեկիս համար հանրային-հասարակական գործունեությունն ինքնանպատակ չի եղել։
Այս ընթացքում հուսով եմ՝ ՀՀ Կառավարության որոշ ներկայացուցիչներ կփոխեն իրենց կարծիքները և կտեղափոխվեն ավելի կառուցողական դաշտ, կսկսեն իրապես լսել մեզ բոլորիս, և հետագայում եւս ստիպված չենք լինի նոր ակցիաներ իրականացնել՝ ի պաշտպանություն մեր իրավունքների։
Այս օրերին ՀՀ Կառավարության հետ բանակցել են Խորհրդի ներկայացուցիչները։ Թե ինչքանով է Կառավարությունն այս պահին ազնիվ իր պատրաստակամության մեջ, կարող են փաստել միայն նրանց հետ ուղիղ բանակցություն իրականացրած անձինք։
Կառավարության հաստատած գործող ծրագրերը պետք է վերանայվեն և ձևափոխվեն այնպես, որ մեր տեղահանված հայրենակիցները կարողանան արժանապատիվ ապրել Հայաստանում և հընթացս պայքարեն Պահանջագրի մնացյալ 11 կետերի համար։