Արցախցի եղբայրներ Արթուր և Աշոտ Պողոսյանները Գրապլինգում դարձան Ֆրանսիայի չեմպիոն
- 20:42 21.04.2025
Ապրիլի 20-ին արցախցի եղբայրներ Արթուր և Աշոտ Պողոսյանները Գրապլինգում (ըմբշամարտ) դարձան Ֆրանսիայի չեմպիոն։ Ավելին, Աշոտը դարձավ կրկնակի չեմպիոն, քանի որ նախօրեին խառը մենամարտերի (MMA) մրցումներում գրավել էր առաջին տեղը։
Եղբայրները ծնվել են Շուշիի շրջանի Քարին տակ գյուղում։ Մանկուց զբաղվել են սպորտով։ Մարզվել են արցախցի հայտնի մարզիչների հետ։ Չեմպիոնների հայրը Արցախի հերոս Արմեն Պողոսյանն է, ով 44-օրյա պատերազմի ընթացքում մյուս քաջարի զինվորների հետ մինչև վերջ կռվել է հայրենի Քարին տակի համար։
2020 թվականից հետո Պողոսյանների ընտանիքը հարյուրավոր արցախցիների նման ստիպված եղավ արտագաղթել արտերկիր։ Նրանք այժմ ապրում են Ֆրանսիայում։
Շնորհավորում ենք տղաներին հաղթանակի կապակցությամբ և մաղթում հետագա հաջողություններ և նորանոր հաղթանակներ՝ արդեն Արցախի դրոշի ներքո։
Արսեն Աղաջանյան
