Իսրայելում անտառային խոշոր հրդեհներ են բռնկվել
- 00:37 01.05.2025
DW
Իսրայելում երկրի Անկախության օրվա համար նախատեսված բոլոր միջոցառումները չեղարկվել են անտառային զանգվածային հրդեհների պատճառով, չորեքշաբթի՝ ապրիլի 30-ին, հայտնել է Իսրայելի հրշեջ-փրկարարական ծառայությունը։ Որոշումը կապված է զանգվածային հավաքույթների անվտանգությունն ապահովելու անհնարինության հետ։
Իսրայելը միջազգային օգնություն է խնդրել մի շարք երկրներից։ Հրդեհաշիջման ինքնաթիռներ և փրկարարներ արդեն ուղարկել են Հունաստանը, Իտալիան և Խորվաթիան։ Պաղեստինի ազգային վարչակազմը նույնպես առաջարկել է իր օգնությունը։
«Թայմս օֆ Իսրայել»-ը հաղորդում է, որ հրդեհը մարելու համար գործի են դրվել 12 ինքնաթիռ, հարյուրից ավելի հրշեջ ջոկատներ և զինվորականներ։ Տարհանումը ընթացքի մեջ է, և նախապատրաստական աշխատանքներ են տարվում մի շարք բնակեցված տարածքների հնարավոր տարհանման համար։ Երկրի գլխավոր մայրուղին փակ է։
Ապրիլի 30-ի առավոտյան Երուսաղեմի լեռներում գտնվող Մեսիլաթ Սիոն բնակավայրի մոտ գտնվող Էշտաոլ անտառում խոշոր հրդեհ է բռնկվել: Հրշեջ-փրկարարական ծառայությունը գործում է «Հրդեհային հարված» ռեժիմով: Այս ռեժիմը հայտարարվում է, երբ կա իրավիճակի նկատմամբ վերահսկողությունը կորցնելու սպառնալիք։
Ոստիկանությունը չի բացառում հրկիզման տարբերակը։ Մեկ անձ արդեն ձերբակալվել է դրանց կազմակերպման կասկածանքով։
Հրշեջները խնդրում են մարդկանց հեռու մնալ Բեյթ Շեմեշի և Երուսաղեմի որոշ շրջաններից։