ԱՄՆ-ն և Ուկրաինան ստորագրել են բնական պաշարների վերաբերյալ համաձայնագիր։ Ի՞նչ կապ ունի Չինաստանը

Կիևը և Վաշինգտոնը համաձայնագիր են ստորագրել համատեղ հանքարդյունաբերության և Ուկրաինայի վերականգնման համար ներդրումային հիմնադրամի ստեղծման մասին, հաղորդում է ԱՄՆ ֆինանսների նախարարությունը։

ԱՄՆ ֆինանսների նախարարության կայքում հրապարակված մամուլի հաղորդագրության մեջ ասվում է, որ համաձայնագիրը կնքվել է «ի նշան այն նշանակալի ֆինանսական և նյութական աջակցության, որը ամերիկացի ժողովուրդը տրամադրել է Ուկրաինայի պաշտպանությանը Ռուսաստանի լայնածավալ ներխուժման սկզբից ի վեր»։

«Այս տնտեսական համագործակցությունը թույլ է տալիս երկու երկրներին համատեղ աշխատել՝ ապահովելու համար, որ մեր համատեղ ակտիվները, տաղանդը և կարողությունները արագացնեն Ուկրաինայի տնտեսական վերականգնումը», – հայտարարել է ԱՄՆ ֆինանսների նախարարությունը։

Միաժամանակ, Ֆինանսների նախարարությունը պարզաբանում է, որ կողմերը կաշխատեն «ծրագրի կառավարման եղանակի վերջնական հաստատման և այս կարևոր գործընկերության զարգացման» ուղղությամբ։

Համաձայնագիրը նախատեսում է հատուկ հիմնադրամի ստեղծում, որը կկառավարի Ուկրաինայում որոշակի տեսակի բնական պաշարների, ենթակառուցվածքային օբյեկտների և որոշ այլ ակտիվների օգտագործումից ստացված եկամուտները։

Ինչպես հետևում է նախագծի տեքստից, համաձայնագրի կնքումից առաջ ԱՄՆ-ի կողմից Ուկրաինային տրամադրված ռազմական օգնությունը չի համարվում ամերիկյան կողմի ներդրում։ Սակայն համաձայնագրի ստորագրումից հետո ԱՄՆ-ի կողմից ներդրվող ցանկացած բան կհամարվի նրանց ներդրումը։ Այս պայմանը՝ արդեն ուղարկված օգնությունը «պարտք» չհամարելը, հիմնարար էր Կիևի համար։

Միացյալ Նահանգները արտոնություններ են ստանում Ուկրաինայի բնական պաշարների զարգացման վերաբերյալ նոր համաձայնագրեր կնքելիս։

Ինչպես չորեքշաբթի օրը հայտարարեց Ուկրաինայի վարչապետ Դենիս Շմիգալը, ընդերքի վերաբերյալ համաձայնագիրը կլինի «բացարձակ գործընկերային». ներդրումային հիմնադրամը կունենա 50/50 մասնաբաժին կառավարման և ֆինանսավորման մեջ։ Ուկրաինան պահպանում է բոլոր ռեսուրսների, ընդերքի և ենթակառուցվածքների նկատմամբ վերահսկողությունը, և ներդրումները կկատարվեն միայն նոր հանքային լիցենզիաների միջոցով։

Հիմնադրամը պետք է ներդրումներ կատարի Ուկրաինայի զարգացման մեջ 10 տարվա ընթացքում։ Սա կարող է լինել կամ կապիտալ ներդրումներ, կամ ուկրաինական արտադրանքի գնում՝ «վերցրու կամ վճարիր» սկզբունքով։

Շմիգալի խոսքով՝ համաձայնագիրը ոչ մի կերպ չի խոչընդոտի Ուկրաինայի անդամակցությանը Եվրամիությանը։

Համաձայնագրի հիմնական նպատակը պատերազմից հետո Ուկրաինայի վերականգնումն է, գրում են ուկրաինական փաբլիկները։ Ոչ մի երկիր, որը այս ամբողջ ընթացքում օգնել է Պուտինին պատերազմել Ուկրաինայի դեմ, չի օգտվի երկրի վերակառուցումից։ Աղբյուրները նշում են, որ այս կետն իրականում ուղղված է Չինաստանին, որը ձգտում է գրավել նոր շուկաներ Եվրոպայում։