Փաշինյանը կմեկնի Մոսկվա, Ալիևը՝ հրաժարվեց
- 20:52 07.05.2025
Նիկոլ Փաշինյանն այսօր հաստատեց, որ մտադիր է մեկնել Մոսկվա և մերժեց արևմտամետ ուժերի քննադատությունը՝ նման գնահատականները համարելով անտեղի։
«[Բալանսավորման] քաղաքականությունը չի նախատեսում որոշների հետ հարաբերություններ կառուցել մյուսների հաշվին։ Ավելին, այն չի նախատեսում Ռուսաստան այցելելուց կամ Ռուսաստանի Դաշնության հետ հարաբերությունները զարգացնելուց և խորացնելուց հրաժարվելը», – ասաց նա։
«Սա կարևոր իրադարձություն է։ Նման այցելությունների ժամանակ քննարկվում են երկկողմ օրակարգի հարցեր, և սխալ կլինի բաց թողնել նման հնարավորությունը։ Ես նման քննադատությունը համարում եմ անհիմն», – նշել է Փաշինյանը։
Վարչապետը չի մանրամասնել, թե ինչ հանդիպումներ են նախատեսված Մոսկվայում, սակայն նշել է, որ շփումներ կլինեն։ Նրա խոսքով՝ այցի գրաֆիկը խիտ է լինելու։
Միաժամանակ հայտնի դարձավ, որ Իլհամ Ալիևը չի գնա Մոսկվայում կայանալիք Հաղթանակի շքերթին, հայտարարել է Ռուսաստանի նախագահի օգնական Յուրի Ուշակովը։
«Մենք հաղորդագրություն ստացանք, որ Ալիևը, ցավոք, չի գա (Մոսկվա՝ Հաղթանակի շքերթին մասնակցելու համար – խմբ.),- Life-ի լրագրող Ալեքսանդր Յունաշևին ասել է Ուշակովը։
Պատճառը, ինչպես Ուշակովն ասաց, Բաքվում բացատրեցին նրանով, որ Ադրբեջանի ղեկավարը պետք է մասնակցի Հեյդար Ալիևին նվիրված ներքին միջոցառումներին։