Հռոմի նոր Պապ է ընտրվել ամերիկացի կարդինալ Ռոբերտ Ֆրենսիս Պրևոստը

Վատիկանում ավարտվել են Հռոմի կաթոլիկ եկեղեցու նոր հովվապետի ընտրությունները։ Քիչ առաջ Սիքստինյան մատուռի ծխնելույզից սպիտակ ծուխ է դուրս եկել՝ վկայելով քվեարկության հաջող ավարտի մասին։

Վատիկանը հայտարարել է, որ 69-ամյա ամերիկացի կարդինալ Ռոբերտ Ֆրենսիս Պրևոստը ընտրվել է Հռոմի կաթոլիկ եկեղեցու նոր ղեկավար։ Նա հայտնի կլինի որպես Հռոմի պապ Լևոն XIV:

Կարդինալ Դոմինիկ Մամբերտին դուրս եկավ Վատիկանի Սուրբ Պետրոսի տաճարի պատշգամբ և լատիներեն հայտարարեց. «Habemus Papam!», որը նշանակում է «մենք ունենք պապ»։ Այնուհետև նա ներկայացրեց նոր պապին և հայտարարեց նրա անունը որպես եկեղեցու ղեկավար։

Մի քանի րոպե անց պատշգամբում հայտնվեց նոր պապը։

Իր ելույթում Լևոն XIV-ը շնորհակալություն հայտնեց նախորդ Հռոմի պապ Ֆրանցիսկոսին և խոսեց մարդկանց միջև կամուրջներ կառուցելու անհրաժեշտության մասին։ «Մարդիկ Քրիստոսին կարիք ունեն որպես կամուրջ, որով կարող են մոտենալ Աստծուն և նրա սիրուն։ Օգնեք մեզ և թույլ տվեք, որ մենք օգնենք միմյանց կամուրջներ կառուցել», – ասաց պապը։

ԱՄՆ նախագահ Դոնալդ Թրամփն անմիջապես արձագանքեց իր ընտրվելու լուրին։ «Շնորհավորում եմ կարդինալ Ռոբերտ Ֆրենսիս Պրևոստին, ով նոր է դարձել Հռոմի պապ։ Մեծ պատիվ է իմանալ, որ նա առաջին ամերիկացի պապն է։ Դա շատ ուրախալի է և մեծ դեր ունի մեր երկրի համար», – գրել է Սպիտակ տան ղեկավարը իր Truth Social սոցիալական ցանցում։