ՀՀ վերնախավը միայն 1945-ի հաղթանակն է տոնում
- 11:05 09.05.2025
ԱԽ քարտուղար Արմեն Գրիգորյանն այսօր Հաղթանակի զբոսայգում լրագրողների հարցին ի պատասխան խուսափեց խոսել Շուշիի ազատագրումից։ Հարցին, թե իր համար մայիսի 9-ը եռատո՞ն է, Գրիգորյանը պատասխանեց․ «Ոչ»։ Նա ասաց, թե ինչու է եկել Հաղթանակի զբոսայգի․ «Եկել ենք հարգելու Երկրորդ համաշխարհային պատերազմում իրենց կյանքը զոհած բոլոր այն մարդկանց հիշատակը, ովքեր իրենց կյանքն են դրել այդ հաղթանակը կերտելու համար»։ Հարցին, թե Արցախյան պատերազմի զոհերի հիշատակը հարգելու համար չի եկե՞լ, նա պատասխանեց․ «Նաեւ իրենց հիշատակը հարգելու համար։ Դուք ասում եք տոն, բայց եռատոնն ու զոհերի հիշատակը հարգելը տարբեր բաներ են»։
Նա անդրադարձավ ադրբեջանսական կրակոցներին եւ հարցին, թե ի՞նչ տեղեկություններ են Հայաստանն ու Ադրբեջանը փոխանցում միմյանց այդ հարցով։
«Հայաստանը խնդրել է դիվանագիտաական ճանապարհով տվյալներ տրամադրել խախտումների վերաբերյալ, որոնց մասին Ադրբեջանը հայտարարում էր։ Դրանց մասին հետաքննություն է կատարել Հայաստանը եւ փոխանցել է Ադրբեջանին բոլոր միջադեպերի վերաբերյալ։ Իսկ Հայաստանի հայտարարած խախտումների մասին, որ Ադրբեջանն է խախտումներ կատարել, դրանց վերաբերյալ Հայաստանը տվյալներ է փոխանցել Ադրբեջանին եւ ակնկալել մանրամասն հետաքննություն։ Իրենց կողմից, ըստ իրենց, հետաքննություն են կատարել դրանց մասին, եւ պարզվել է, որ ընդհանուր առմամբ այդպիսի խախտումներ չեն եղել»,- ասաց Գրիգորյանը։