Թրամփը Սաուդյան Արաբիային վաճառել է 142 միլիարդ դոլարի զենք և ներգրավել 1 տրիլիոն դոլարի ներդրումներ
- 09:52 14.05.2025
ԱՄՆ-ն և Սաուդյան Արաբիան ստորագրել են «պատմության մեջ ամենամեծ զենքի վաճառքի համաձայնագիրը», – երեքշաբթի՝ մայիսի 13-ին, հայտարարեց Սպիտակ տունը՝ նախագահ Դոնալդ Թրամփի Մերձավոր Արևելք այցի առաջին օրը։ 142 միլիարդ դոլարի գործարքը Սաուդյան Արաբիային կտրամադրի «առաջադեմ մարտական սարքավորումներ և ծառայություններ տասնյակից ավելի ամերիկյան պաշտպանական ընկերությունների կողմից», ասվում է հայտարարության մեջ։
Թրամփը նշել է, որ Մերձավոր Արևելք կատարած իր այցը կխթանի Միացյալ Նահանգներում ներդրումները ավելի քան 1 տրիլիոն դոլարով՝ խոշոր ընկերությունների հետ սպասվող գործարքների շնորհիվ։ Սպիտակ տունը հայտարարեց 600 միլիարդ դոլարի ընդհանուր արժողությամբ գործարքների մասին։
Միջոցառմանը մասնակցել են ամերիկացի գործարարներ, ինչպիսիք են Tesla-ի և SpaceX-ի հիմնադիր Իլոն Մասկը և Nvidia-ի գործադիր տնօրեն Ջենսեն Հուանգը, հաղորդում է Bloomberg-ը։ Գործակալությունը նշում է, որ Թրամփի կողմից հայտարարված թիվը «չի դիմանում որևէ քննադատության». հանդիպման ժամանակ հայտարարված գործարքների ընդհանուր գումարը չի գերազանցում 300 միլիարդ դոլարը, իսկ Սպիտակ տունը հայտարարել է Սաուդյան Արաբիայի կողմից 600 միլիարդ դոլար ներդնելու մտադրության մասին։ Միաժամանակ, 1 տրիլիոն դոլարը համապատասխանում է Սաուդյան Արաբիայի ամբողջ ՀՆԱ-ին։
Bloomberg-ը հաղորդում է, որ գործարքները ներառում էին Boeing Co. ուղևորատար ինքնաթիռների ընդլայնված գնումներ և Սաուդյան Արաբիայի խոստումը՝ թույլ տալ Մասկի Starlink ծառայության օգտագործումը ավիացիոն և ծովային տրանսպորտում։ Գործակալությունը հայտնում է, որ ամերիկյան տեխնոլոգիական հսկաներ Nvidia-ն, AMD-ն, Global AI-ն և Amazon-ը մտադիր են համագործակցել Սաուդյան Արաբիայի Humain ընկերության հետ, որը ստեղծվել է թագավորությունում արհեստական ինտելեկտի ենթակառուցվածքներ զարգացնելու համար։