ՀՀ քաղաքացիություն ստանալու համար դիմել է Արցախից բռնի տեղահանված մոտ 9300 անձ
- 17:59 19.05.2025
ՀՀ քաղաքացիություն ստանալու համար դիմել է Արցախից բռնի տեղահանված մոտ 9300 անձ, նրանցից 8350-ին արդեն շնորհվել է քաղաքացիություն։ Այս մասին step1.am-ին տեղեկացրեց ՀՀ ներքին գործերի նախարարության միագրացիայի և քաղաքացիության ծառայության պետ Նելլի Դավթյանը։
Նշենք, որ նախորդ տարեվերջին՝ 2024 թվականի դեկտեմբերի 20-ի դրությամբ ՀՀ քաղաքացիությասն համար դիմել էր 6649 արցախցի։ Այսինքն՝ վերջին 5 ամիսների ընթացքում քաղաքացիություն ստացող արցախցիների թիվն աճել է ընդամենը 2600-ով։ Նելլի Դավթյանն ավելի վաղ մեզ հետ զրույցում ասել էր՝ սպասվում է, որ այս տարվա ընթացքում քաղաքացիության դիմումների աճ կլինի։ Step1.am-ի հարցին, թե հիմա սպասված աճը կա՞, Նելլին Դավթյանը պատասխանեց․ «Քիչ, բայց ակտիվացում կա։ Նախկինում օրական 30-40 քաղաքացիության դիմում էինք ստանում, հիմա այդ թիվը կազմում է 50»։
Հիշեցնենք, որ ՀՀ կառավարության բնակապահովման ծրագրից օգտվելու համար պարտադիր պայման է, որ Արցախից բռնի տեղահանված ընտանիքները պետք է ՀՀ քաղաքացիություն ձեռք բերեն։ Բայց անգամ այս ծրագրից օգտվելու համար արցախցիները չեն շտապում ՀՀ քաղաքացիություն ստանալ։ Խնդիրն այն է, որ արցախցիների մեծ մասը կարծում են, որ իրենք ՀՀ քաղաքացի են, քանի որ նախկինում ստացել են ՀՀ անձնագիր՝ «070» կոդով։ Եվ մարդիկ նշում են, որ Հայաստանի կառավարությունը 2023 թվականի հոկտեմբերի 26-ի 1864-Ն որոշմամբ խախտել է իրենց իրավունքները։
Ռոզա Հովհաննիսյան