Մոսկվան «բուֆերային գոտի» է կառուցում Ուկրաինայի հետ և պահանջում Զելենսկիի հեռացումը
- 00:34 23.05.2025
Ուկրաինայում հրադադարի մասին հուշագիր ստորագրելու համար այդ երկրի ժողովուրդը պետք է ընտրի նոր նախագահ, հայտարարել է Ռուսաստանի արտաքին գործերի նախարարությունը։ Ուկրաինայի նախագահ Վլադիմիր Զելենսկին կորցրել է իր լեգիտիմությունը և, հետևաբար, չի կարող ստորագրել միջազգային փաստաթղթեր, հինգշաբթի՝ մայիսի 22-ին, ՏԱՍՍ-ին տված հարցազրույցում ասել է Ռուսաստանի արտաքին գործերի նախարարության իրավաբանական վարչության տնօրեն Մաքսիմ Մուսիխինը։
Հուշագիրը պետք է ստորագրի «այն անձը, ով ունի ժողովրդի մանդատը դա անելու համար», քանի որ «հակառակ դեպքում խնդիրներ կլինեն», – հավելեց նա։ Մուսիխինը նաև հայտարարել է, որ Գերագույն ռադայի խոսնակը կարող է ևս ունենալ միջազգային փաստաթղթեր ստորագրելու լիազորություններ։
Ռուսաստանի զինված ուժերը աշխատում են Ուկրաինայի հետ սահմանի երկայնքով անվտանգության բուֆերային գոտի ստեղծելու ուղղությամբ, հայտարարել է Պուտինը կառավարության անդամների հետ հանդիպման ժամանակ։
Նա նշեց, որ Բելգորոդի, Բրյանսկի և Կուրսկի մարզերը տուժում են հրետանային հարձակումներից, անօդաչու թռչող սարքերից և դիվերսանտներից։