«Երազանքների աշխարհ»-ը արցախցիների համար ծրագրեր է իրականացնում

«Երազանքների աշխարհ» բարեգործական կազմակերպությունը հիմնադրվել է 2003 թ․ և ստեղծման օրվանից իրականացնում է բազմաբնույթ աջակցության ծրագրեր։

Հիմնադրամի գործադիր տնօրենն է Հարություն Ղուկասյանը։

«Կազմակերպությունն իր գործունեության ընթացքում զբաղվել և զբաղվում է բազմապիսի ծրագրերով՝ սոցիալական, իրավական, բնապահպանական, առողջական, կրթական և մշակութային։

Հիմնադրամի գլխավոր ծրագրերից է ցերեկային խնամքի, բուժման և զարգացման կենտրոնը, որը գործում է 2010 թվականից ի վեր։

Այստեղ նեղ մասնագիտական ծառայություններ են ստանում հաշմանդամություն, հատուկ կարիքներ ունեցող, կյանքի դժվարին պայմաններում հայտնված և սոցիալապես անապոհով երեխաները։

Երեխաները ստանում են հոգեբանի, հատուկ մանկավարժի, լոգոպեդի, ֆիզիոթերապիստի, էրգոթերապիստի, արտթերապիստի և կավաթերապիստի անհատական ծառայություններ ՝ըստ պահանջի։

Սրանից զատ հիմնադրամը ողջ տարվա կտրվածքով իրականացնում է բազմապիսի ծրագրեր՝ աջակցելով 650 և ավել երեխաների։

Բռնի տեղահանության սկզբնական շրջանում աջակցության ծրագրերում ընդգրկված էին նաև 180 արցախցի բալիկներ, սակայն բնակավայրը փոխելու պատճառով հետագայում թիվը կրճատվեց։

Հիմնական ծրագրերից է հրատապ պարենային ծրագիրը, որով սոցիալական աջակցություն է ցուցաբերվում անապահով ընտանիքներին:

Ծրագրերի ցանկում են, օրինակ, Դպրոցի ճանապարհ ծրագիրը, որի նպատակն է յուրաքանչյուր սեպտեմբերին ընդառաջ աջակցություն ցուցաբերել առաջին դասարան գնացող երեխաներին։

Քրիստոնյա սերունդ ծրագրի շրջանակներում բազմաթիվ երեխաներ հիմնադրամի և բարի մարդկանց շնորհիվ մկրտվում են Հայ Առաքելական Սուրբ եկեղեցում։

2023-ից առ այսօր իրականացվել է երկու ծրագիր՝ կոնկրետ արցախցիների համար․ առաջինը՝  «Մասնագիտության վերածնունդ» ծրագիրն է, որի ժամանակ արցախցի 25 կանայք ստացել են նոր մասնագիտություն, ապահովվել համապատասխան գործիքներով, ինչպես նաև ստացել են դիպլոմներ որպես մասնագետներ և մեր միջնորդությամբ լավագույններն անցել են աշխատանքի կամ հիմնել սեփական բիզնեսը։

Ծրագրի շնորհիվ արցախցի մեր հայրենակիցներին հնարավորություն է տրվել հաղթահարել ծառացած խնդիրները և փորձել նոր կյանք սկսել։

Մյուս ծրագիրն իրականացվել է մեր գործենկերներից՝ Շող ՀԿ-ի հետ, որի ընթացքում արդեն եռամսյա ժամկետով թվով 15 արցախցի բարձրագույն կրթություն ունեցող կանայք մեր իսկ կենտրոնում անցել են նեղ մասնագիտական վերապատրաստում և վարձատրվել դրա համար։

Նրանցից մի քանիսը մեզ մոտ մնացել են որպես հիմնական աշխատողներ և կամավորներ»։

Այս մասին Step1.am-ի հետ զրույցում տեղեկացրել են «Երազանքների աշխարհ» բարեգործական կազմակերպությունից։

Արսեն Աղաջանյան