Էրդողանը Մեղրիի ճանապարհի հարցով դիմում է Իրանին, այլ ոչ թե Հայաստանին

Թուրքիայի նախագահ Ռեջեփ Էրդողանը Բերձորից վերադարձի ճանապարհին օդանավում պատասխանելով լրագրողների հարցերին անդրադարձել է նաև Ադրբեջանի պահանջած «Զանգեզուրի միջանցքի» հարցին՝ հայտարարելով, որ ակնկալում են Իրանի աջակցությունը։

«Ինչ վերաբերում է Զանգեզուրի հարցին… Զանգեզուրի անցուղին Ադրբեջանի համար ոչ միայն ցամաքային կապ է Նախիջևանի հետ, այլև նոր ինտեգրացիոն գիծ, որը տարածվում է դեպի թյուրքական աշխարհ՝ Թուրքիայի միջոցով: Այս անցուղու կարճ ժամանակում բացումը նաև կամրապնդի Կովկասի տրանսպորտային և էներգետիկ ենթակառուցվածքները», – թուրքական լրատվամիջոցների փոխանցմամբ՝ ասել է Ռեջեփ Էրդողանը և հավելել, – «մենք ակնկալում ենք, որ մեր հարևան Իրանը կաջակցի այս քայլերին, որոնք կծառայեն մեր տարածաշրջանի խաղաղությանը, կայունությանը և զարգացմանը»։

Հիշեղնենք, որ Մեղրիի ճանապարհով “Զանգեզուրի միջանցք՞ բացելու ամբողջ իմաստը՝ հայ-իրանական սահմանի ոչնչացումն է․ եթե լինի միջանցք, չի լինի սահման։ 

Իրանը կատեգորիկ դեմ է միջանցքային տրամաբանությանը և պարզ ասում է, որ եթե որևէ մեկը ուզենա սահման փոխել, Իրանը կոշտ կպատասխանի։ Եւ Իրանի զգուշացումն է, որ մինչ օրս պահում է հայ-իրանական սահմանը։ 

Սակայն Իրանն ու ԱՄՆ-ը հիմա պատրաստվում են հաշտեցման, ընդ որում, Իրանը ստիպված է որոշ զիջումների գնալ։ Էրդողանը շուտով կգնա ԱՄՆ, և նրա խոսքերը Զանգեզուրի մասին վկայում են, որ նա Թրամփին կփորձի համոզել՝ որպես պայման Իրանին ներկայացնել նաև “զանգեզուրի միջանցքի” բացումը։ 

Հայաստանի մասին այս համատեքստում արդեն չի խոսվում։