Իսրայելը հարվածել է Իրանին, Թեհրանում պայթյուններ են լսվել

Իսրայելը ուրբաթ գիշերը սկսեց հարվածներ հասցնել Իրանում գտնվող թիրախներին։ Երկիրը հայտարարեց, որ հարձակվել է Իրանի միջուկային ծրագրի վրա և արտակարգ դրություն հայտարարեց՝ Թեհրանի կողմից պատասխան հարվածներ ստանալու սպասման պատճառով։ Այս մասին գրում է ВВС-ն։

«Մենք հարվածել ենք Իրանի միջուկային ծրագրի սրտին։ Մենք թիրախավորել ենք Նաթանզի ուրանի հարստացման գլխավոր օբյեկտը։ […] Մենք նաև հարվածել ենք Իրանի բալիստիկ հրթիռների ծրագրի սրտին», – տեսաուղերձում ասել է Իսրայելի վարչապետ Բենիամին Նեթանյահուն՝ հավելելով, որ զինվորականները հարվածել են նաև իրանցի միջուկային գիտնականներին։

Նեթանյահուն ասել է, որ գործողությունը «կշարունակվի այնքան օր, որքան անհրաժեշտ լինի Իրանից սպառնալիքը վերացնելու համար»։

Իրանի պետական ​​լրատվամիջոցները հաղորդել են, որ Իսրայելը հարվածներ է հասցրել Թեհրանի և այլ քաղաքների բնակելի թաղամասերին, սակայն տեղեկատվության հաստատում չի եղել։

Իսրայելի պաշտպանության ուժերի խոսնակը հայտարարել է, որ իսրայելական բանակը սկսել է «կանխարգելիչ, ճշգրիտ և համակցված գործողություն»՝ Իրանի միջուկային ծրագրին հարվածելու համար։

Նա հավելել է, որ հարվածները եղել են ի պատասխան «իրանական ռեժիմի կողմից Իսրայելի դեմ շարունակական ագրեսիայի»։

Հայտարարության համաձայն՝ տասնյակ իսրայելական կործանիչներ մասնակցել են Իրանի տարածքներին հարվածելու գործողության առաջին փուլին։

«Այսօր Իրանը ավելի մոտ է, քան երբևէ, միջուկային զենք ձեռք բերելուն։ Իրանի ռեժիմի ձեռքում գտնվող զանգվածային ոչնչացման զենքերը գոյության սպառնալիք են ներկայացնում Իսրայել պետության և ամբողջ աշխարհի համար», – ասել է բանակը։

Հայտարարության մեջ ասվում է, որ բանակը «պատրաստ է շարունակել գործել անհրաժեշտության դեպքում»։

Ռոյթերսը, հղում անելով իրանական պետական ​​լրատվամիջոցներին, հաղորդել է, որ Թեհրանից հյուսիս-արևելք լսվել են պայթյուններ։ BBC-ի լրագրողները նաև պայթյունների հաստատում են ստացել Թեհրանի բնակիչներից։

Իրանում գտնվող Ռոյթերսի աղբյուրը նույնպես հայտնել է պայթյունների մասին Նաթանզի գործարանի մոտ, որը գտնվում է Թեհրանից ավելի քան 200 կմ հեռավորության վրա։ Իրանի բարձրաստիճան պաշտոնյան նաև գործակալությանը հայտնել է, որ երկրի ղեկավարությունը արտակարգ խորհրդակցություն է անցկացնում։

Իրանական լրատվամիջոցների տվյալներով՝ Թեհրանի միջազգային օդանավակայանում չվերթները դադարեցվել են։

Միևնույն ժամանակ, Իսրայելում գիշերը հնչել են օդային հարձակման ազդանշանները։

Իսրայելի իշխանությունները նույնպես փակել են երկրի օդային տարածքը։ Flightradar24-ի տվյալներով՝ Բեն Գուրիոն օդանավակայան ուղևորվող ինքնաթիռները ուղղորդվել են այլ օդանավակայաններ։

Իրանի պետական ​​հեռուստատեսությունը հաղորդել է, որ Իրանի Իսլամական հեղափոխության պահապանների կորպուսի (ԻՀՊԿ, Զինված ուժերի էլիտար ստորաբաժանումներ) հրամանատար Հոսեյն Սալամին, ԻՀՊԿ Խաթամ ​​ալ-Անբիա կենտրոնական շտաբի հրամանատար Ղոլամ Ալի Ռաշիդը, ֆիզիկոս Մոհամմադ Մեհդի Թեհրանչին և Իրանի ատոմային էներգիայի կազմակերպության (ԻԷՕԻ) նախկին ղեկավար Ֆերեյդուն Աբբասին, հնարավոր է, սպանվել են Իսրայելի կողմից Թեհրանի վրա հարձակումների ժամանակ։

«Կան հաղորդագրություններ գեներալ Հոսեյն Սալամիի, գեներալ Ղոլամ Ալի Ռաշիդի, պարոն Թեհրանչիի և պարոն Ֆերեյդուն Աբբասիի սպանության մասին Իսրայելի ռեժիմի կողմից», – ասել է հաղորդավարը ուղիղ եթերում։