Եվս մեկ սարսափելի գիշեր Կիևում. առնվազն 14 մարդ է զոհվել
- 10:17 17.06.2025
Նախնական տվյալներով՝ հունիսի 17-ի գիշերը Կիևի վրա ռուսական անօդաչու թռչող սարքերի զանգվածային հարվածի հետևանքով զոհվել է առնվազն 14 մարդ, 44-ը՝ վիրավորվել։ Այս մասին Telegram ալիքում հայտնել է Ուկրաինայի ներքին գործերի նախարար Իգոր Կլիմենկոն։
Նրա խոսքով՝ հարված է հասցվել քաղաքի տարբեր շրջաններում գտնվող 27 վայրի։ Դրանց թվում են բնակելի շենքեր, ուսումնական հաստատություններ և կարևորագույն ենթակառուցվածքային օբյեկտներ։
Կիևի քաղաքապետ Վիտալի Կլիչկոյի խոսքով՝ ավերվել է ավելի քան 40 բնակարան։ «Կարող են մարդիկ լինել փլատակների տակ։ Մենք չենք բացառում, որ մահացածների թիվը կարող է աճել», – ասել է Կլիչկոն «Կիև» հեռուստաալիքի եթերում։ Ավելի վաղ նա հայտնել էր 16 տուժածների մասին։ «Կիևի վրա հարձակման ժամանակ, Սոլոմենսկի շրջանում, այն տան դիմաց, որտեղ բժիշկները օգնություն էին ցուցաբերում տուժածներին, մահացել է 62-ամյա ԱՄՆ քաղաքացի։ Բժիշկները հաստատել են կլինիկական մահը՝ կենսաբանական մահ», – գրել է Կլիչկոն իր Telegram ալիքում։