Թրամփը կոչ է անում Իսրայելին դադարեցնել Նեթանյահուի դատավարությունը

ВВС

ԱՄՆ նախագահ Դոնալդ Թրամփը կոչ է արել Իսրայելի դատական ​​համակարգին «ներում շնորհել» կոռուպցիայի համար դատվող Բենիամին Նեթանյահուին կամ ընդհանրապես դադարեցնել գործը։

Իր «Truth Social» հարթակում գրառման մեջ նա գրել է, որ ԱՄՆ-ն փրկեց Իսրայելը՝ ակնարկելով Իսրայելի և Իրանի միջև պատերազմին միջամտությանը, և այժմ «կփրկի» նաև Նեթանյահուին։

Գրառումը հայտնվել է այն ժամանակ, երբ Թրամփը հայտարարել է, թե իմացել է, որ Բենիամին Նեթանյահուն երկուշաբթի օրը կրկին պետք է ներկայանա դատարան։

Իսրայելի վարչապետն արդեն մի քանի անգամ ներկայացել է դատարան՝ կաշառակերության, խարդախության և վստահության չարաշահման գործով իր դատավարության շրջանակներում, որը սկսվել է 2020 թվականին։

Նրա դատավարությունը տեղի է ունենում այն ​​ժամանակ, երբ Նեթանյահուն շարունակում է պաշտոնավարել։ Վարչապետը հերքում է իր դեմ առաջադրված բոլոր մեղադրանքները։

Truth Social-ում գրառման մեջ Թրամփը իր վաղեմի դաշնակցին անվանել է «զինվոր և մեծ հերոս, որը շատ բան է արել» Իսրայելի համար։

Նա ասել է, որ Նեթանյահուի դատավարությունը պետք է «անհապաղ կարճվի», կամ նրան ներում շնորհվի։

Թրամփը Նեթանյահուի դեմ գործը անվանել է «վհուկների որս», ինչպես նա բազմիցս անվանել է անձամբ իր դեմ հետաքննությունները։

«Արդարադատության այս ծաղրերգությունը չի կարելի թույլ տալ», – գրել է ԱՄՆ նախագահը։

Սոցիալական ցանցերում պատասխան գրառման մեջ Բենյամին Նեթանյահուն շնորհակալություն է հայտնել Թրամփին անձամբ իրեն և ամբողջ Իսրայելին «հուզիչ աջակցության» համար։

Նեթանյահուի քննադատները նշում են, որ նա միտումնավոր երկարաձգում է ռազմական հակամարտությունները բոլոր ճակատներում՝ դատավարությունն ավելի հետաձգելու համար՝ հույս ունենալով, որ իր դեմ գործը այս կամ այն ​​կերպ կկարճվի։