ՀՀ քաղաքացիություն է ստացել 9346 արցախցի, նաև 4400 անչափահաս
- 12:04 03.07.2025
ՀՀ քաղաքացիություն է ստացել 9346 արցախցի։ Այս մասին կառավարության այսօրվա նիստում ասաց ՆԳ նախարար Արփինե Սարգսյանը։
«Դիմումները մենք արտահերթ վերցնում ենք, ընդ որում, վերջին ժամանակահատվածում բավականին ինտենսիվացել են դիմումները։ Եթե վիճակագրությանն անդրադառնամ, արդեն իսկ հանրապետության նախագահի հրամանագրով 9346 անձի շնորհվել է ՀՀ քաղաքացիություն։ Ընդ որում, չունենք մերժումներ։ Զուգահեռաբար, եթե դիմումները նայենք, 10 961 դիմում ունենք այս պահին։
Ի տարբերություն այլ անձանց՝ ԼՂ-ից տեղահանված մեր հայրենակիցների դեպքում մենք 4,5 ամսվա փոխարեն շուրջ 1 ամսում ամփոփում ենք ամբողջ աշխատանքը եւ ներկայացնում ենք։ Այդ թվում՝ դիմումներն ընդունվում են նաեւ շրջիկ սպասարկման գրասենյակներում։ Այսօր, օրինակ, Չարենցավանում ունենք շրջիկ սպասարկման գրասենյակներ։ Եվ եթե մեր հայրենակիցները ցանկություն ունեն, կարող են միանգամից մոտենալ եւ դիմումները ներկայացնել»,- ասաց նապժխարարը։
Արփինե Սարգսյանը հավելեց, որ ծնողների քաղաքացիություն ստանալու ուժով նաեւ 4400 անչափահաս է անձնագրավորվել ՀՀ քաղաքացու անձնագրով։