Արցախցիներին հրավիրեցին փոխվարչապետի մոտ, նրանք սկզբից հրաժարվեցին, հետո որոշեցին գնալ հանդիպման
- 11:21 14.07.2025
Արցախցիները բողոքի ակցիա ու նստացույց են անցկացնում կառավարության շենքի մոտ։ Նրանք շտապ պահանջագիր ներկայացրեցին կառավարությանը։
Կառավարության ներկայացուցիչն իջավ ու արցախցիներին առաջարկեց պատվիրակություն կազմել եւ գնալ փոխվարչապետ Տիգրան Խաչատրյանի մոտ հանդիպման։
Արցախցիները հակված չեն հանդիպման գնալ, Արցախի ՄԻՊ Գեղամ Ստեփանյանն ասաց, որ միշտ գնացել են հանդիպման ու քննարկման, բայց իրենց չեն հասկացել, խնդիրներին լիարժեք լուծում չեն տվել։
«Հիմա, եթե նորից բարձրացանք, նույն բանն ասացին, ի՞նչ օգուտ տվեցինք։ Ցանկալի է, որ համապատասխան անձն իջի այստեղ, ժողովուրդը, ժողովրդի եւ լրագրողների հարցերին պատասխան»,- նշեց Գեղամ Ստեփանյանը։
Արցախցիներն ընթերցեցին իրենց պահանջագիրն ու հայտարարեցին, որ ակնկալում են, որ փոխվարչապետ Տիգրան Խաչատրյանն անձամբ կիջնի ներքեւ ու կպատասխանի իրենց հարցերին։
Արցախցիների իրավունքների պաշտպանության խորյհրդի անդամ Ապրես Մարգարյանն ասաց, որ որոշել են բարձրանալ կառավարություն՝ հանդիպման։ Նա ասաց, որ որեւէ քննարկում չեն ունենելու, գնում են լսեն իրենց բարձրացրած հարցերի պատասխանները։