Հայաստանի հարավի բռնագրավման «դաբրո». Թրամփը մեջբերել է Ալիևին
- 14:27 22.07.2025
ԱՄՆ նախագահ Դոնալդ Թրամփն իր Truth սոցիալական ցանցի էջում կիսվել է Ալիևի՝ օկուպացված Շուշիում Գլոբալ մեդիաֆորումի ժամանակ ունեցած ելույթի հատվածով։
Ալիևը նշել է, որ Դոնալդ Թրամփը կիսում է ադրբեջանական ժողովրդի հետ ընդհանուր հիմնարար, այդ թվում՝ ընտանեկան արժեքները և հենց այդ պատճառով ԱՄՆ-ում ցանկանում են նրա վերընտրությունը։ Նա նաև ընդգծել է, որ Թրամփը միակ ԱՄՆ նախագահն է, ով չի սկսել ոչ մի պատերազմ և ընդհակառակը՝ ձգտել է դադարեցնել դրանք։
Ալիևը շնորհակալություն է հայտնել նրան Հայաստանի և Ադրբեջանի միջև վերջնական համաձայնության հասնելու հարցում անձնական հետաքրքրության համար։
Հիշեցնենք, որ վերջին շաբաթներին, Երևանի, Բաքվի և Անկարայի միջև «կարգավորման» համատեքստում, քննարկվում է ԱՄՆ-ի առաջարկը՝ Մեղրիի ճանապարհը 100 տարով վարձակալելու վերաբերյալ: Դոնալդ Թրամփը պաշտոնապես չի մեկնաբանել այս տեղեկատվությունը, չնայած մի քանի օր առաջ նա ասել էր, որ «մենք հրաշք ենք գործել», և Երևանն ու Բաքուն շուտով խաղաղություն կկնքեն։
Թրամփը նույն ոգևորությամբ խոսում է և այլ հակամարտությունների մասին, որոնք կարող է դադարեցնել, բայց «մեծահոգաբար» թույլ է տալիս մարդկանց որոշ ժամանակով սպանել միմյանց: Սա վերաբերում է Ռուսաստանի, Իսրայելի և Թուրքիայի գործողություններին, որոնց Թրամփը «կանաչ լույս» է վառել։
Էքսպանսիոնիստ առաջնորդները խաղում են Թրամփի սնապարծության վրա և գովաբանում նրան, նույնիսկ նրան առաջադրելով Նոբելյան մրցանակի և ստանալով ուժ կիրառելու «դաբրո»։ Ալիևը, ըստ էության, նույնպես իր ներդրումն է ունեցել Թրամփի գովաբանության մեջ՝ փորձելով ստանալ համաձայնություն Մեղրիի ճանապարհի, հայ-իրանական սահմանի և Հայաստանի ամբողջ հարավի՝ մինչև Երասխի բռնի զավթման համար։
Այն փաստը, որ Թրամփը մեջբերում է Ալիևին, նշանակում է, որ եթե ամերիկյան առաջարկը չընդունվի Հայաստանի կողմից, ապա «մեղավորը» Հայաստանը կլինի, և Ալիևն ու Էրդողանը չեն ունենա այլ «տարբերակ», բացի ուժայինից։ Առավել ևս, որ Իրանը շարունակում է պնդել «աշխարհաքաղաքական սահմանների անփոփոխության» վրա։
Փաշինյանի մամուլի քարտուղար Նազենի Բաղդասարյանն արդեն հայտարարել է, որ ճանապարհի բացումը հնարավոր է միայն Հայաստանի ինքնիշխանության պահպանման դեպքում, չնայած նա չի բացառել, որ հայ սահմանապահների հետ շփումը կարող է լինել «անհպում»։ Իրանը, իր հերթին, վերջերս կրկին սկսել է խոսել «աշխարհաքաղաքական սահմանների» փոփոխության թույլ չտալու մասին։ Լրատվամիջոցները անմիջապես հայտնեցին, որ Ադրբեջանը զորքեր է կուտակում Իրանի հետ սահմանին, իսկ Թրամփը հայտարարեց, որ անհրաժեշտության դեպքում Միացյալ Նահանգները կրկին կհարվածի Իրանին։
Թրամփի կողմից Ալիևի հայտարարությանը հղում կատարելը նշանակում է, որ քանի որ Հայաստանն ու Իրանը չեն ցանկանում ամեն ինչ «անել խաղաղ ճանապարհով», Ալիևին տրվել է «կանաչ լույս» ուժային լուծման համար։ Եվ ԱՄՆ-ն կօգնի նրան։
