Գերմանացի նախկին պատգամավորը դատապարտվել է Ադրբեջանից կաշառք վերցնելու գործով
- 21:08 31.07.2025
DW
Բունդեսթագի Քրիստոնեա-սոցիալական միության (ՔՍՄ) նախկին պատգամավոր Էդուարդ Լինթները Մյունխենի Բարձրագույն շրջանային դատարանի կողմից դատապարտվել է ինը ամսվա պայմանական ազատազրկման՝ կաշառակերության հետ կապված այսպես կոչված «ադրբեջանական գործով»։ Այս մասին չորեքշաբթի՝ հուլիսի 30-ին, հայտնել է AFP գործակալությունը։
Բացի այդ, դատարանը որոշել է Բունդեսթագի նախկին պատգամավոր Կարին Շտրենցի ժառանգորդից բռնագանձել մոտ 110,000 եվրո, որը նա, ենթադրաբար, ստացել է Լինթներից։
«Ադրբեջանական գործով» մեղադրյալների թվում էին քաղաքական գործիչներ Աքսել Ֆիշերը Կարլսրուեից և Էդուարդ Լինթները Ստորին Ֆրանկոնիայի Բավարիայի շրջանից։ Առաջինը մեղադրվում էր կաշառակերության մեջ, երկրորդը՝ ընտրված պաշտոնյաներին կաշառելու մեջ՝ Եվրոպայի խորհրդի խորհրդարանական վեհաժողովում (ԵԽԽՎ) Ադրբեջանի օգտին որոշումներ կայացնելու նպատակով։