Միքայել Սրբազանի կալանքի ժամկետը երկարաձգեց եւս 10 օրով
- 16:53 15.08.2025
Շիրակի թեմի առաջնորդ, կալանավորված Միքայել Սրբազանին կալանքից ազատելու միջնորդությունը դատարանը մերժեց։ Այս մասին հայտարարեց դատավոր Արմինե Մելիքսեթյանը։
Խափանման միջոց կալանքը դատավորն անփոփոխ թողեց, կալանքի ժամկետը երկարաձգեց եւս 10 օրով։
Փաստաբան Երեմ Սարգսյանը իր դժգոհությունը հայտնեց դատարանի այս որոշման վերաբերյալ եւ ասաց. «Ակնհայտ ապօրինի որոշում էր, դուք իրավասու չեք այս գործով արդարադատություն իրականացնել»։
Ըստ մեղադրական եզրակացության, Միքայել արքեպիսկոպոս Աջապահյանին մեղադրանք է առաջադրվել այն բանի համար, որ նա ունենալով արքեպիսկոպոսի հոգևոր աստիճան և հանդիսանալով Հայ Առաքելական Սուրբ Եկեղեցու Շիրակի թեմի առաջնորդը, պարբերաբար հրապարակային ելույթներով հանդես գալով զանգվածային լրատվության միջոցներով, ունենալով մեծ թվով հետևորդներ և հետևաբար նաև՝ իր խոսքով հասարակության անդամների վարքագիծն ուղղորդելու զգալի հնարավորություն, համաձայն չլինելով ներքին և արտաքին քաղաքականության հետ կապված հարցերի վերաբերյալ ՀՀ կառավարության դիրքորոշումների օգտագործելով զանգվածային լրատվության միջոցները, տեղեկատվական ու հաղորդակցական տեխնոլոգիաները, նախ՝ 2024թվականի փետրվարի 3-ին՝ ապա նաև՝ 2025թվականի հունիսի 21-ին, զանգվածային լրատվության միջոցների ներկայացուցիչներին տրված հարցազրույցների ընթացքում հնչեցրել է իշխանությունը զավթելուն ուղղված հրապարակային կոչեր։