Ուկրաինան Վաշինգտոն եկավ հաղթաթղթերով. ինչ խոստացավ Թրամփը

Սպիտակ տունն ավարտեց Դոնալդ Թրամփի, Վլադիմիր Զելենսկու և մի քանի եվրոպացի առաջնորդների մասնակցությամբ բանակցությունները, որոնք եկել էին աջակցելու Ուկրաինայի նախագահին: Թրամփը խոստացավ Ուկրաինայի անվտանգության երաշխիքներ, թեև Եվրոպայից, բայց «համաձայնեցված» Միացյալ Նահանգների հետ, ինչպես նաև հայտարարեց Պուտինի և Զելենսկու անձնական հանդիպման նախապատրաստման մեկնարկի մասին: Ճիշտ է, Կրեմլը, իր հերթին, հրապարակավ ուղիղ խոստում չտվեց, բայց Զելենսկին հստակեցրեց, որ պատրաստ է տարածքային հարցերը քննարկել միայն Պուտինի հետ։

Ուկրաինան վաղուց հստակեցրել է, որ պատրաստ է քննարկել իրավիճակից դուրս գալու ելքը՝ հաշվի առնելով տարածքային իրողությունները. Զելենսկին հաստատում է, որ չի վերահսկում երկրի ամբողջ տարածքը 1991 թվականի սահմաններում, բայց պատրաստ չէ իրավաբանորեն ճանաչել Ռուսաստանի սեփականությունը այն տարածքների նկատմամբ, որոնք նա բռնագրավել է 2014 թվականից ի վեր։

Դոնալդ Թրամփի հայտարարությունները ցույց են տալիս, որ նա նույնպես հասկացել է, որ տարածքների պարզ փոխանակումը չի ավարտի պատերազմը: Financial Times-ի տվյալներով՝ Վլադիմիր Զելենսկին Միացյալ Նահանգներին հստակեցրել է, որ չի ընդունի որևէ գործարք, որը ներառում է տարածքային զիջումներ Ռուսաստանին։

«Շատ կարևոր է. մենք [Թրամփի և Պուտինի հետ] եռակողմ հանդիպման ժամանակ առաջնորդների մակարդակով կքննարկենք բոլոր զգայուն հարցերը, այդ թվում՝ տարածքայինները։ Նախագահ Թրամփը կփորձի կազմակերպել նման հանդիպում», – լրագրողներին ասաց Զելենսկին։

Ուկրաինական պատվիրակությունը Սպիտակ տուն է ժամանել մի քանի «хխաղաքարտերով», որոնք Թրամփը պարզապես չէր կարող անտեսել։

Դրանցից առաջինը և ամենակարևորը Եվրոպայի միաձայն աջակցությունն է (հատկապես Թրամփին ամենից համակրող եվրոպացի առաջնորդների, չհաշված Օրբանին՝ Ալեքսանդր Ստաբին և Ջորջի Մելոնիին)։ Նրանց ներկայությունը Վաշինգտոնում՝ և մասնավորապես որպես Զելենսկու թիմի անդամներ, այլ ոչ թե որպես անկողմնակալ միջնորդներ, ինչպես Թրամփը ներկայացնում է իրեն, Վլադիմիր Զելենսկու դիրքերի էական ամրապնդումն է։

Երկրորդ «խաղաքարտը», որը Ուկրաինան բերեց, լրատվամիջոցների հաղորդագրություններ են Ուկրաինայում արտադրված «Ֆլամինգո» թևավոր հրթիռի սերիական արտադրության մեկնարկի մասին։ Եթե հրթիռի նշված տեխնիկական բնութագրերը համապատասխանում են իրականությանը, ապա այս զենքն ավելի մեծ հեռահարության է և ավելի կործանարար, քան ռուսական «Կալիբր» թևավոր հրթիռները։ Եվ և՛ Մոսկվան, և՛ Սանկտ Պետերբուրգը նրա հասանելիության սահմաններում են։

Երրորդ «քարտը» Դոբրոպիլյայի մոտ ռուսական զորքերի ճեղքման վերացումն է Ուկրաինայի պաշտպանության ուժերի կողմից: Հավանաբար, սկզբում այս ճեղքումը պետք է լիներ ռուսների «հաղթաքարտը» Անքորիջում կայանալիք բանակցություններից առաջ. դա կօգներ Վլադիմիր Պուտինին ցույց տալ, որ առաջնագիծը ճաքեր է տալիս, գրում է BBC-ն։

Զելենսկին հավելել է, որ Ուկրաինայի անվտանգությունը բաղկացած է երկու բաղադրիչից՝ ուժեղ բանակ և երաշխիքներ «մեծ երկրներից», այդ թվում՝ ԱՄՆ-ից։

Բայց այժմ Միացյալ Նահանգները դժկամությամբ էր ստանձնում որևէ պարտավորություն՝ դա թողնելով Մեծ Բրիտանիային և Ֆրանսիային՝ իրենց «կամավորների կոալիցիայով»։ Սակայն բանակցություններից մեկ օր առաջ Թրամփի հատուկ դեսպանորդ Սթիվ Վիտկոֆը առաջարկել է, որ Ամերիկան թույլ տա ՆԱՏՕ-ի կանոնադրության 5-րդ հոդվածին նման երաշխիքներ։

Անվտանգության երաշխիքների իրականացման կոնկրետ մեխանիզմները դեռևս չեն հայտարարվել, բայց Թրամփը հայտարարել է, որ Ուկրաինան «մեծ օգնություն» կստանա ցանկացած համաձայնագրի շրջանակներում: Եվրոպական զորքերը կլինեն «պաշտպանության առաջին գիծը», – ասել է Թրամփը: Բայց Միացյալ Նահանգները նույնպես «կներգրավվի և պատրաստվում է օգնել նրանց», – հավելել է Թրամփը։

Ալյասկայում կայացած հանդիպման ժամանակ Վլադիմիր Պուտինին, հավանաբար, հաջողվել է համոզել Թրամփին, որ Ռուսաստանը երբեք չի համաձայնի հրադադարի, եթե չհասկանա, թե ինչ տեսք կունենա խաղաղությունը, որը, ըստ Պուտինի, պետք է լինի Ռուսաստանի պայմաններով։

«Ես չեմ կարծում, որ հրադադար է պետք։ Գիտեմ, որ դա լավ կլիներ։ Ինձ դուր է գալիս հրադադարի գաղափարը մեկ պատճառով. դուք անմիջապես դադարեցնում եք մարդկանց սպանելը։ Բայց մենք կարող ենք խաղաղության համաձայնագիր կնքել, մինչ կողմերը կռվում են։ Ռազմավարական առումով դա [հրադադարը] կարող է լավ չլինել մեկ կողմի համար», – ասել է Թրամփը՝ պատասխանելով լրագրողների հարցերին։

Գագաթնաժողովի ժամանակ Դոնալդ Թրամփը դադար է տվել զանգահարելու Վլադիմիր Պուտինին։ Դրանից հետո Թրամփը ուղղակիորեն հայտարարել է, որ առաջնորդները համաձայնել են սկսել պատերազմող երկրների առաջնորդների հանդիպման նախապատրաստումը։

Այնուամենայնիվ, Ռուսաստանի նախագահի օգնական Յուրի Ուշակովն ավելի զգույշ էր. նա խոսել է միայն «բանակցություններում Մոսկվայի և Կիևի ներկայացուցիչների մակարդակը բարձրացնելու հնարավորության ուսումնասիրության գաղափարի» մասին։

Մի պահ Դոնալդ Թրամփը, մոռանալով միկրոֆոնի մասին, իր եվրոպացի գործընկերներին ասել է. «Կարծում եմ՝ նա [Պուտինը] ուզում է գործարք կնքել։ Գիտե՞ք։ Որքան էլ խելագար լինի»։