Բայրամովի սենսացիոն խոստովանությունը․ ինչու կանգնեցվեց 44-օրյա պատերազմը
- 15:42 27.08.2025
Օգոստոսի 8-ից անցած այս մի քանի շաբաթվա մեջ պաշտոնական Բաքուն և Երևանն այնքան բան բացահատեցին, որ ապագա միջազգային տրիբունալին արդեն գործ չի մնա անելու։
Նախ, Նիկոլ Փաշինյանը բառացիորեն խոստովանեց, թե ինչու է հրաժարվել 2019 թվականին առաջարկված զիջումներից, չնայած սա 44-օրյա պատերազմից խուսափելու միակ միջոցն էր։ Նա ասաց, որ հակառակ դեպքում Հայաստանը կկորցներ իր անկախությունը։ Նա չմանրամասնեց, թե ինչպես դա կպատահեր, սակայն հավանաբար հույս ուներ, որ Արցախի հարցը վերջնական կփակվեր օկուպացիայով և տեղահանությամբ, և Բաքվի և Անկարայի հետ խաղաղություն կսկսվի։
Սակայն Ռուսաստանը փրկեց Բաքվին, կանգնեցնելով պատերազմը և Արցախ զորք մտցնելով։ Դա Բաքվին թույլ տվեց 3 տարի ուժ հավաքել, ստանալ համաշխարհային ուժերի կոնսենսուս և հարմար պահի ավարտել գործը։
Այսօր դա խոստովանեց Բաքվի ԱԳՆ ղեկավար Բայրամովը, որն ասաց, որ 44-օրյա պատերազմի շարունակությունը Ադրբեջանին սպառնում էր շատ վտանգավոր սցենարներով։
Նա բացատրել է, որ Ալիևի որոշումը՝ դադարեցնել պատերազմը «Ստեփանակերտից ընդամենը մի քանի կիլոմետր հեռավորության վրա» փրկել է Ադրբեջանին շատ վտանգավոր սցենարներից։ Բայրամովը մանրամասնել է, որ կանխվել է տարածաշրջանում արտաքին միջամտությունը, Բաքուն նաև խուսափել է միջազգային ճնշումից՝ էթնիկ զտումների մեղադրանքներով։ Ռուսական միջամտությունը Բայրամովը “արտաքին” չի համարում։
Նա հայտնել է, որ 44-օրյա պատերազմի ընթացքում «մի շարք առաջատար խաղացողներ» սպառնացել են Ադրբեջանին պատժամիջոցներով։
Ո՞վ էր սպառնացել Ալիևին և ի՞նչ կլիներ, եթե 2020 թ․ ամեն ինչ ավարտվեր։ Ինչո՞ւ Հայաստանի կառավարությունը չի թմբկահարել, չի ստիպել այդ խաղացողներին սանձել Ալիևին, միջազգային զորքեր մտցնել Արցախ և հայտարարել օկուպացիայի մասի։ Ինչո՞ւ է ստորագրվել հենց Պուտինի ներկայացված “խաղաղությունը”։
Երբևէ Փաշինյանը նաև այս հարցերին կպատասխանի։
Իսկ այսօր Ալիևն է խոստովանել, որ «եթե մենք ցանկանայինք արգելափակել հայ-իրանական սահմանը, դա կանեինք դեռ 2020 թվականի նոյեմբերին»: Նա չի ասել, թե ինչու դա չարեցին՝ որ Իրանը զենք է կուտակել սահմանին, իսկ միջազգային խաղացողները սանկցիանեով էին սպառնում։
Նա շեշտել է միայն, որ ռազմական տեսանկյունից Սյունիքի հարավային հատվածի գրավումը լուրջ դժվարություն Բաքվի համար չէր ներկայացնում։
Ապա ինչո՞ւ չգրավեցին։ Գուցե, Հայաստանը խոսք է տվել ամեն ինչ “խաղաղությա՞մբ” անել։
Նաիրա Հայրումյան