ԿԽՄԿ-ն փակում է գրասենյակները Բաքվում և Գորիսում
- 21:52 29.08.2025
Կարմիր խաչի միջազգային կոմիտեի (ԿԽՄԿ) պատվիրակությունը Ադրբեջանի իշխանությունների պահանջով սեպտեմբերի 3-ին կփակի իր գրասենյակը Բաքվում։ Այս մասին լրագրողների հետ ճեպազրույցում ասաց Հայաստանում ԿԽՄԿ պատվիրակության ղեկավար Դաֆնե Մարեն։
«Այո, իսկապես գրասենյակը փակվելու է սեպտեմբերի 3–ին, սակայն դա չի նշանակում, որ մեր շփումը Ադրբեջանի իշխանությունների հետ կդադարի։ Մենք շարունակելու ենք փորձեր անել անդրադարձ ունենալու և առաջարկել մեր չեզոք միջնորդի դերը մի շարք հարցերում։ Այստեղ ամենակարեւոր հարցերից մեկը անհետ կորածների խնդիրն է։ Սա հաշվի առնելով, մենք հույս ունենք, որ առաջիկայում կունենանք հնարավորություններ՝ ընդգրկվելու որպես չեզոք միջնորդ», –ասաց նա։
«Դուք տեսել եք, որ խաղաղության պայմանագրում նշված է, որ կլինի որոշակի մեխանիզմ, որը կգործի միջազգային կազմակերպությունների ներգրավվածությամբ՝ անհայտ կորածների ճակատագրերի պարզաբանման ուղղությամբ։ Եվ այս հարցում մենք տեսնում ենք հնարավորություն մեր դերը որոշարկելու և հետագա աշխատանքներում որոշակի աջակցություն ցուցաբերելու առումով»,–ասաց նա։
Ճշտող հարցին՝ կա՞ որեւէ հնարավորություն, որ գերիներին այցերը կշարունակվեն, նա պատասխանեց. «Մենք դեռեւս շարունակում ենք քննարկումները Ադրբեջանի իշխանությունների հետ տվյալ հարցի շուրջ։ Այս պահին մենք չենք կարողանում շարունակել մեր աշխատանքն այս ուղղությամբ։ Մենք անընդհատ վերադառնալու ենք այս հարցին, մեր փորձերը շարունակվելու են»։
Կարմիր խաչի միջազգային կոմիտեի (ԿԽՄԿ) գրասենյակը Հայաստանում կդադարեցնի իր գործունեությունը Գորիսում մինչև տարեվերջ։ Այս մասին Գորիսում լրագրողների հետ զրույցում հայտարարեց ԿԽՄԿ գրասենյակի ղեկավար Դաֆնե Մարեյը։
Նա նշեց, որ այսօր տարածաշրջանում լարվածությունը զգալիորեն նվազել է, և դեռևս դրանց սրման նշաններ չկան։ Միևնույն ժամանակ, մարդասիրական ծրագրերի ֆինանսավորման հետ կապված համաշխարհային իրավիճակը բարդացել է, և կազմակերպությունը պետք է հարմարվի նոր պայմաններին։
«Ամեն դեպքում, մենք չենք լքում երկիրը։ Մենք շարունակում ենք բավականին ակտիվ լինել տարածաշրջանում, մասնավորապես՝ սահմանամերձ շրջաններում, և կշարունակենք աշխատել», – ընդգծեց Մարեյը։
Նա նշեց, որ Հայաստանը փոքր երկիր է, ուստի սահմանամերձ շրջաններում նախագծեր իրականացնելու հնարավորությունը կպահպանվի Երևանի գրասենյակից։ ԿԽՄԿ-ն կշարունակի ծրագրեր իրականացնել տարբեր տարածաշրջաններում՝ դրանք հարմարեցնելով ներկայիս կարիքներին։