Ռուսաստանում սովորական դարձած պատերազմ. կրկին Ռոստով
- 08:51 02.09.2025
Դոնի Ռոստովի Լևենցովսկի միկրոշրջանում Ուկրաինայի զինված ուժերի հարվածների հետևանքով երկու բնակելի շենքերի վերին հարկերը հրդեհվել են, իր Telegram ալիքում հայտնել է Ռոստովի մարզի նահանգապետի պաշտոնակատար Յուրի Սլյուսարը։
Մարզի ղեկավարի պաշտոնակատարի խոսքով՝ Տկաչևի փողոցում գտնվող 19-հարկանի շենքի ճակատային մասը և տանիքը վնասվել են, սակայն բնակիչների տարհանման անհրաժեշտություն չի եղել։ Ելյանի փողոցում վնասվել են 25-հարկանի շենքի բնակարանների ճակատային մասը և ապակեպատումը։ Գիշերը, նշել է Սլյուսարը, չորս մարդ, այդ թվում՝ մեկ երեխա, դիմել է բժշկական օգնության։ Հարձակումից հետո մասնագետները նրանց առողջությանը «լուրջ վնաս» չեն գրանցել։
Միևնույն ժամանակ, օպերատիվ աշխատակիցները բնակարաններից մեկում հայտնաբերել են պայթող արկ, ուստի սկսվել է շենքի 320 բնակիչների տարհանումը։ Բնակչության համար ստեղծվել է ժամանակավոր տեղավորման կենտրոն։