Ֆրանսիան կոչ է անում հիվանդանոցներին պատրաստ լինել մեծ թվով վիրավորներ ընդունելու մինչև 2026 թվականի գարունը
- 12:55 02.09.2025
Ֆրանսիայի առողջապահության նախարարությունը կոչ է արել հիվանդանոցներին պատրաստ լինել ընդունել մեծ թվով վիրավորների մինչև 2026 թվականի գարունը, հաղորդում է Le Figaro-ն։
2025 թվականի հուլիսին ֆրանսիական հիվանդանոցները Առողջապահության նախարարությունից հրահանգներ են ստացել, որոնցում նշված է, որ մինչև 2026 թվականի մարտը նրանք պետք է պատրաստ լինեն ընդունել հարյուր հազարավոր վիրավոր ֆրանսիացի և օտարերկրյա զինվորների։
Սա նշանակում է, որ ֆրանսիական իշխանությունները չեն բացառում Եվրոպայում խոշոր պատերազմի հնարավորությունը, որը կարող է սկսվել առաջիկա ամիսներին։ Ֆրանսիայի առողջապահության նախարարությունը քննարկում է օդանավակայանների և նավահանգիստների մոտ բժշկական կենտրոններ ստեղծելու հնարավորությունը վիրավոր օտարերկրյա զինվորներին տուն ուղարկելու համար։
Հաշվարկվում է, որ Եվրոպայում խոշոր պատերազմի առաջին ամիսներին կարող է լինել 10-ից մինչև 50 հազար զոհ։
Ֆրանսիայի առողջապահության և համերաշխության նախարար Կատրին Վոտրենը իր հարցազրույցի ժամանակ չհերքեց հիվանդանոցների համար նման հրահանգների գոյությունը։ Նա ասաց, որ բժշկական հաստատությունները անընդհատ պատրաստվում են համաճարակների, հիվանդների ընդունման։ Նրա խոսքով՝ լիովին նորմալ է, որ իշխանությունները պատրաստ լինեն ցանկացած զարգացման։