Ֆրանսիան, Բելգիան, Մոնակոն, Մալթան և Լյուքսեմբուրգը հայտարարեցին Պաղեստինը ճանաչելու մասին

Ֆրանսիայի նախագահ Էմանուել Մակրոնը հայտարարեց Պաղեստինի պետությունը ճանաչելու մասին։ Ֆրանսիացի առաջնորդը ելույթ ունեցավ երկուշաբթի՝ սեպտեմբերի 22-ին, Նյու Յորքի ՄԱԿ-ի կենտրոնակայանում, որտեղ Ֆրանսիայի և Սաուդյան Արաբիայի նախաձեռնությամբ տեղի է ունենում պետությունների և կառավարությունների ղեկավարների համաշխարհային գագաթնաժողով։ ՄԱԿ-ի տվյալներով՝ ֆորումի գլխավոր նպատակն է փորձել վերակենդանացնել երկու պետությունների՝ Իսրայելի և Պաղեստինի, լուծումը միջազգայնորեն ճանաչված սահմանների շրջանակներում։

«Այսօր Ֆրանսիան ճանաչում է Պաղեստինի պետությունը», – ասաց Մակրոնը։ Նա ասաց, որ դա արվում է «իսրայելցի և պաղեստինցի ժողովուրդների միջև խաղաղության անվան տակ»։

Ժամանակն է «ազատ արձակել Համասի կողմից պահվող 48 պատանդներին» և վերջ դնել «պատերազմին, Գազայի ռմբակոծություններին, կոտորածներին և բնակչության արտագաղթին», հաղորդում է AFP-ն։

Ավելի ուշ՝ նույն հանդիպման ժամանակ, Բելգիայի վարչապետ Բարտ դե Վևերը, Մոնակոյի, Մալթայի և Լյուքսեմբուրգի առաջնորդների հետ միասին, հայտարարեց Պաղեստինը որպես պետություն ճանաչելու մասին։

Միացյալ Թագավորությունը, Կանադան, Ավստրալիան և Պորտուգալիան սեպտեմբերի 21-ին ճանաչեցին Պաղեստինի պետությունը։

Սաուդյան Արաբիայի արտաքին գործերի նախարար, արքայազն Ֆեյսալ բին Ֆարհան Ալ Սաուդը կոչ արեց այս երկրներին հետևել օրինակին։ «Մենք կոչ ենք անում մյուս բոլոր երկրներին նմանատիպ պատմական քայլ կատարել», – ընդգծեց նա։ Այս միջոցառումը «զգալի ազդեցություն կունենա երկու պետությունների լուծման իրականացման ջանքերի վրա», – հավելեց նա, հայտնում է DW-ն։