Փաշինյանը մեկնում է Մոսկվա, հնարավոր է՝ մի քանի օրով
- 18:07 24.09.2025
Նիկոլ Փաշինյանը կմասնակցի Մոսկվայում կայանալիք Գլոբալ ատոմային ֆորումին, հայտնել է Կրեմլի մամուլի ծառայությունը։
Ավելի վաղ ՀՀ խորհրդարանի խոսնակ Ալեն Սիմոնյանը լրագրողներին հայտնել էր, որ Մոսկվայում նախատեսվում է Հայաստանի և Ռուսաստանի ղեկավարներ Նիկոլ Փաշինյանի և Վլադիմիր Պուտինի հանդիպումը։ Նա այս հայտարարությունն արել է՝ մեկնաբանելով այն տեղեկությունները, որ Փաշինյանը պլանավորում է մասնակցել սեպտեմբերի վերջին Մոսկվայում կայանալիք Համաշխարհային ատոմային շաբաթին։
Նշվում է, որ Պուտինը ելույթ կունենա սեպտեմբերի 25-ին՝ Ռուսաստանի միջուկային արդյունաբերության 80-ամյակին նվիրված Գլոբալ ատոմային ֆորումում։
«Ռուսաստանի ղեկավարի հետ միասին ֆորումին կմասնակցեն Բելառուսի Հանրապետության նախագահ Լուկաշենկոն, Մյանմայի Միության նախագահի պաշտոնակատար Մին Աուն Հլայնը, ՀՀ վարչապետ Փաշինյանը, Եթովպիայի Դաշնային Դեմոկրատական Հանրապետության վարչապետ Ահմեդը, Ատոմային էներգիայի միջազգային գործակալության (ՄԱԳԱՏԷ) գլխավոր տնօրեն Գրոսին, ինչպես նաև Իրանի Իսլամական Հանրապետության, Ուզբեկստանի Հանրապետության, Եգիպտոսի Արաբական Հանրապետության, Նիգերի Հանրապետության և մի շարք մասնագիտացված կազմակերպությունների ներկայացուցիչներ», – ասվում է հայտարարության մեջ։
Փաշինյանը կարող է Մոսկվայում մնալ մի քանի օր։