Նիսի հայկական համայնք. Չի կարելի վատնել մեր նախնիների հայկական հողերը
- 20:33 03.10.2025
Վերջերս, որպես Քերոլայն Քոքսի անվան վերականգնողական կենտրոնի պատվիրակության անդամ, ես այցելեցի Ֆրանսիա։ Այցի շրջանակներում Նիսում կազմակերպվեց նաև հանդիպում հայ համայնքի հետ։ Մենք երկար և հետաքրքիր զրույց ունեցանք մեր հայրենակիցների հետ, որոնց թվում էին նաև 2020-2023 թվականների իրադարձությունների հետևանքով Արցախից բռնի տեղահանված ընտանիքներ։
«Մեծ ցավով ենք հետևում ներկայիս Հայաստանում կատարվողին։ Մենք հետևում ենք, թե ինչպես են օրվա իշխանությունները, «խաղաղություն» կնքելու պատրվակով, միտումնավոր մեր հայրենիքը տանում դեպի պետականության կորուստ, մոռանալով մեր դարավոր պատմությունը և վատնելով մեր բնիկ հողերը։ Նրանք աստիճանաբար խզում են կապերը նաև սփյուռքի հետ՝ ստեղծելով տարբեր խոչընդոտներ։ Նույնիսկ սփյուռքի կողմից Հայաստան ուղարկվող մարդասիրական օգնությունը հարկվում է։ Այս ամենը պատահական չէ, քանի որ սփյուռքի ներկայացուցիչները հայ ժողովրդի դեմ արյունալի հանցագործությունների զոհեր և ականատեսներ են, և, համապատասխանաբար, նրանք խոչընդոտ են հանդիսանում «երկարատև խաղաղության» կնքմանը։
Պատմությունը, ցավոք, ոչ մի դաս չի տալիս հայերին։ Ինչպե՞ս կարող ենք հաշտություն կնքել հարևանների հետ, ովքեր դարեր շարունակ ոչնչացրել և աքսորել են մեր ժողովրդին։ Խաղաղությունը կարող է գալ միայն այն ժամանակ, երբ ցեղասպանությունը ճանաչվի, երբ լուծվի Արցախի հարցը, և մեր բոլոր հայրենակիցներին հնարավորություն տրվի վերադառնալ իրենց հայրենիք։ Երբ գերիները ազատ արձակվեն, և ադրբեջանական զորքերը վերադառնան իրենց նախնական դիրքերը։ Մեր ազգը պետք է դադարի ապրել «որտեղ հաց, այնտեղ կաց» սկզբունքով։ Մենք պետք է միավորվենք մեկ ընդհանուր նպատակի՝ հայկական պետականության պահպանման շուրջ», – նշեցին համայնքի ներկայացուցիչները։
Արսեն Աղաջանյան