Համասը համաձայնվեց ազատ արձակել բոլոր իսրայելցի պատանդներին։ Թրամփը կոչ արեց Իսրայելին անհապաղ դադարեցնել կրակը

Պաղեստինյան ՀԱՄԱՍ խմբավորումը պատրաստակամություն հայտնեց վերադարձնել իր կողմից պահվող բոլոր իսրայելցի պատանդներին՝ թե՛ կենդանի, թե՛ մահացած։ Կարճ ժամանակ անց ԱՄՆ նախագահ Դոնալդ Թրամփը հայտարարեց, որ Իսրայելը պետք է անհապաղ դադարեցնի Գազայի հատվածի վրա հարձակումները՝ պատանդների ազատ արձակումն ապահովելու համար։

Դրանից առաջ Թրամփը վերջնագիր էր ներկայացրել Համասին. խմբավորումը պետք է կամ ընդունի Գազայի հատվածի համար նրա խաղաղության ծրագիրը մինչև կիրակի երեկո, կամ էլ կոչնչացվի։

Ուրբաթ երեկոյան ՀԱՄԱՍ-ը սոցիալական ցանցերում հայտարարություն տարածեց՝ արտահայտելով իր պատրաստակամությունը մասամբ իրականացնել Թրամփի և Իսրայելի վարչապետ Բենիամին Նեթանյահուի կողմից հաստատված ծրագիրը։

«Ռազմական գործողությունների դադարեցման և զորքերի Գազայի հատվածից լիակատար դուրսբերման հասնելու համար շարժումը հայտարարում է բոլոր իսրայելցի գերիներին՝ թե՛ կենդանի, թե՛ մահացած, ազատ արձակելու իր համաձայնության մասին՝ համաձայն նախագահ Թրամփի առաջարկության մեջ ներառված փոխանակման բանաձևի», – ասվում է հայտարարության մեջ։

Դոնալդ Թրամփի խաղաղության ծրագրի շրջանակներում իսրայելցի պատանդներին ազատ արձակելու համաձայնության գալուց մեկ օր անց պաղեստինյան ՀԱՄԱՍ խմբավորումը խոստացավ, որ դա կարող է տեղի ունենալ մի քանի օրվա ընթացքում: Այնուամենայնիվ, դիտորդները նշում են, որ ՀԱՄԱՍ-ը լիովին չի ընդունել Թրամփի ծրագիրը, և Իսրայելը շաբաթ օրը շարունակել է հարվածներ հասցնել Գազայի հատվածին: