Բաքուն և Թբիլիսին հրաժարվեցին գալ Երևան՝ Եվրախորհրդարանի դիրքորոշման պատճառով
- 14:00 27.10.2025
Ադրբեջանի խորհրդարանական պատվիրակությունը չի մասնակցի «Եվրոնեստ» խորհրդարանական վեհաժողովի 12-րդ լիագումար նիստին, որը նախատեսված է հոկտեմբերի 28-30-ը Հայաստանի մայրաքաղաքում։
Պատվիրակության ղեկավար Թահիր Միրկիշլին «APA» լրատվական գործակալությանը հայտնել է, որ Եվրախորհրդարանի փաստաթղթերն ու հայտարարությունները անհամատեղելի են Ադրբեջանի ինքնիշխանության և տարածքային ամբողջականության սկզբունքների հետ։
Նրա կարծիքով, նման հայտարարությունները չեն նպաստում Ադրբեջանի և Հայաստանի միջև խաղաղ կարգավորմանը, այլ ավելի շուտ օգուտ են բերում հակամարտության երկարաձգմամբ հետաքրքրված ուժերին։
Վրաստանը նույնպես հրաժարվել է մասնակցել լիագումար նիստին։ Եվրոպական ինտեգրման խորհրդարանական հանձնաժողովի նախագահ Լևան Մախաշվիլին այս որոշումը բացատրել է Եվրախորհրդարանի որոշ պատգամավորների թշնամական հռետորաբանությամբ, ինչպես նաև այն փաստով, որ «Եվրոնեստը» խրախուսում է հակաժողովրդավարական վարքագիծը և բռնի կամ արմատական քաղաքական օրակարգերը։