Շոյգուն մեղադրեց Արևմուտքին «Ռուսաստանը մասնատելու» մտադրության մեջ, բայց չհիշատակեց Էրդողանին
- 12:16 28.10.2025
Ռուսաստանի Անվտանգության խորհրդի քարտուղար Սերգեյ Շոյգուն հայտարարել է, որ Արևմուտքը ագրեսիվ ճնշում է գործադրում Ռուսաստանի վրա և ձգտում է երկիրը բաժանել տասնյակ անկախ պետությունների: «Նրանց նպատակը մեր երկրի ինքնիշխանությունից զրկելն է: Նրանք ցանկանում են մեր հայրենիքը բաժանել տասնյակ փոքր պետական կազմավորումների, այնուհետև ենթարկեցնել դրանք, շահագործել և օգտագործել իրենց սեփական եսասիրական շահերի համար», – գրել է Շոյգուն «Արգումենտի ի Ֆակտի» թերթում հրապարակված հոդվածում:
Նրա խոսքով՝ արևմտյան երկրները սկսել են «հզոր հակառուսական քարոզչություն» և հարձակվում են Ռուսաստանի պատմության, մշակույթի և «հոգևոր արժեքների» վրա: Ավելին, Շոյգուն նշել է, որ շարունակվում են «սեպ խրել մեր երկրի և ԱՊՀ երկրների ժողովուրդների ներդաշնակության և եղբայրության մեջ»:
Ինքը՝ Սերգեյ Կուժուգետ-օղլի Շոյգուն, Տուվայից է և սերտ հարաբերություններ ունի Թուրքիայի հետ: Հիշեցնենք, որ ռուս-թուրքական «սրացումներից» մեկի ժամանակ Էրդողանը հայտարարել է, որ կարող է քանդել Ռուսաստանը այնտեղ բնակվող «25 միլիոն մուսուլմանների» օգնությամբ:
Շոյգուն չի հիշատակում Էրդողանի սպառնալիքները, ինչպես նաև չի հիշատակում, թե ինչպես է Ռուսաստանն ինքը վանում ԱՊՀ «երկրները». բավական է հիշել Արցախում ռուս-թուրքական կենտրոնը և Ռուսաստանի շարունակական ագրեսիան Ուկրաինայում։
Սակայն Շոյգուն մեղադրում է միայն Արևմուտքին։