Ինչպե՞ս կավարտվեն Չեռնոգորիայում հակաթուրքական բողոքի ցույցերը
- 20:32 29.10.2025
Նախորդ երեկոյան Պոդգորիցայում գտնվող Թուրքիայի դեսպանատան մոտ տեղի ունեցավ թուրք միգրանտների արտաքսման պահանջով մեծ բողոքի ցույց: Ցուցարարները վանկարկել են «Թուրքեր, դուրս»:
Ավելի վաղ Չեռնոգորիայի կառավարությունը արձագանքել էր միջադեպին՝ ժամանակավորապես դադարեցնելով Թուրքիայի քաղաքացիների համար առանց վիզայի մուտքի ռեժիմը:
Հակամարտությունը տեղի է ունեցել հոկտեմբերի 26-ին Զաբյելո շրջանում, որտեղ Թուրքիայի քաղաքացիների մի խումբ հարձակվել է 25-ամյա տեղացի բնակչի վրա, որը պաշտպանել էր մի կնոջ: Տղամարդուն ծեծել և դանակահարել են: Միջադեպին մասնակցել են ոչ միայն Թուրքիայի, այլև Ադրբեջանի քաղաքացիներ:
Դեպքից հետո տեղի բնակիչների մի ամբոխ հավաքվել է այն խաղատան մոտ, որտեղ փակվել էին հարձակվողները՝ այն հրկիզելու մտադրությամբ: Ոստիկանությունը գրոհել է շենքը, և տասնյակ թուրք քաղաքացիներ ձերբակալվել են:
Դեպքը կտրուկ սրել է հակաթուրքական տրամադրությունները Չեռնոգորիայում: Տեղական լրատվամիջոցների հաղորդագրությունների համաձայն՝ անհայտ անձինք հրկիզել են Թուրքիայի քաղաքացիներին պատկանող մեքենաներ և սրճարաններ Չեռնոգորիայի մի քանի քաղաքներում: