ՅՈՒՆԵՍԿՕ-ն ծաղրում է հայերին․ համաժողով Երևանում
- 18:34 24.11.2025
Խաղողօրհնեք Ստեփանակերտում, 2023
Նոյեմբերի 27-28-ը Երևանում կանցկացվի «Մշակութային խաչմերուկ» երևանյան միջազգային համաժողովը` նվիրված ՅՈՒՆԵՍԿՕ-ի «Մշակութային ինքնարտահայտման ձևերի բազմազանության խրախուսման և պաշտպանության մասին» կոնվենցիայի ընդունման 20-ամյակին: Երևան կժամանեն ավելի քան մեկ տասնյակ երկրների պատվիրակություններ, ինչպես նաև ներկայացուցիչներ ՅՈւՆԵՍԿՕ-ից և այլ միջազգային կազմակերպություններից:
Մեկ տարի առաջ ՅՈՒՆԵՍԿՕ-ի պաշտոնյա Քրիստա Պիկկատը «Արմենպրես»-ին ասել էր, որ «Լեռնային Ղարաբաղի բնակչության կողմից 2023 թվականին փախուստից և Հայաստանում բնակություն հաստատելուց հետո» ՅՈՒՆԵՍԿՕ-ն չի կարող այցելել Ղարաբաղ՝ համաձայն «Հակամարտության ժամանակ մշակութային արժեքների պաշտպանության մասին» կոնվենցիայի։ Պաշտոնյայի խոսքով՝ Ղարաբաղում այլևս հակամարտություն չկա, և այժմ նրանք կարող են միայն համաձայնության գալ Ադրբեջանի հետ մոնիթորինգի հարցում։ Քանի որ Բաքուն ինքն է որոշում՝ թույլատրել մոնիթորինգը, ՅՈՒՆԵՍԿՕ-ն չի այցելել Արցախ։
Սակայն կազմակերպությունը պատրաստակամություն է հայտնել համագործակցել Հայաստանի կառավարության հետ՝ ղարաբաղցի հայերի «ոչ նյութական ժառանգության պահպանման» հարցում։
Հայտնի չէ, թե ինչ է արել ՅՈՒՆԵՍԿՕ-ն Արցախի ժառանգությունը պահպանելու համար։ Իրականում, այն կարող է ոչինչ չանել, քանի որ Հայաստանն առանց այդ էլ ՅՈՒՆԵՍԿՕ-ի հետ կապված միջոցառումներ է անցկացնում Երևանում։
Մինչդեռ կազմակերպությունը ծաղրում է Հայաստանին՝ նշելով, որ «մեզ համար շատ կարևոր է, որ համայնքի հետ քննարկվի, թե որ սովորույթներն ու ավանդույթները պետք է պահպանվեն»։ Քրիստա Պիկկատը ընդգծել է, որ անհրաժեշտության դեպքում, անհետացման եզրին գտնվող ավանդույթների դեպքում, անհրաժեշտ է գտնել դրանք պահպանելու եղանակներ։ Հա, բա ոնց։