Ամոթ է․ չի կարելի ազգի համար ողբերգական օրը վերածել պառակտման ակտի
- 11:20 07.12.2025
Այսօր Գյումրիումում, տասնյակ հազարավոր մարդկանց կյանք խլած և Հայաստանի ամբողջ հյուսիսը ավերած ողբերգական երկրաշարժի 37-րդ տարելիցի օրը, մատուցվում է երկու զուգահեռ պատարագ։ Նիկոլ Փաշինյանը և նրա թիմը մասնակցում են մեկին, իսկ գյումրեցիները և այս օրը նրանց աջակցելու եկածները՝ մյուսին։
Ինչո՞ւ Փաշինյանը ընտրեց հենց այս օրը Գյումրիում պատարագին մասնակցելու համար։ Ինչո՞ւ է հայ ազգի համար սրբազան ամեն ինչ վերածվում պառակտման աղբյուրի։
Կառավարությունը չպետք է երկրաշարժի զոհերի հիշատակի օրը վերածեր պառակտման ակտի. դա սրբապղծություն է, որը դժվար թե կարելի լինի քավել եկեղեցում։
Ինչպես հայտնում են ԶԼՄ-երը, այսօր առավոտյան իրավապահները բացել են Գյումրիի Յոթ Վերք եկեղեցին, որը երեկ երեկոյան քահանաների՝ թղթի վրա գրված ստորագրություններով կնիքվել ու փակվել էր: Այստեղ է պատարագ մատուցվում, որին ներկա է Նիկոլ Փաշինյանը:
Նիկոլ Փաշինյանի հետ փաստորեն Գյումրիի Յոթ Վերք եկեղեցի են գնացել նրան աջակցող բարձրաստիճան հոգեւորականները։
Շիրակի թեմի հոգևորականները, երգչախումբը, նույնիսկ մոմ վաճառողները բոյկոտում են այս պատարագը: Նրանք պատարագի կմասնակցեն Յոթ Վերքի դիմաց գտնվող Սուրբ Ամենափրկիչ եկեղեցում:
Երեկ տարածած հայտարարությամբ Շիրակի թեմի 29 քահանաները վերահաստատել էին, որ իրենցից որևէ մեկը չի մասնակցի մի պատարագի, որտեղ չեզոքացվելու է Ամենայն Հայոց կաթողիկոսի անունը: Ավելին՝ շեշտել էին՝ եթե իրենցից բացի, որևէ մեկը պատարագ մատուցի առաջնորդանիստ եկեղեցում, դա կնշանակի Յոթ Վերքի բռնազավթում:
Գարեգին Երկրորդ վեհափառինին գահից հեռացնել ցանկացող վարչապետ Փաշինյանի պայմանն է, որ իր մասնակցությամբ պատարագներում չհնչի կաթողիկոսի անունը, ընդ որում՝ օրերս խոստովանել էր, որ այդ գործին կարող է նաև Ազգային անվտանգության ծառայությունը խառնվել: