Արցախցի ընտանիքներին աջակցելու հարցում Սայիդա Պողոսյանին օգնում են բազմաթիվ մարդիկ

Արցախից բռնի տեղահանված շատ ընտանիքներ դեռեւս գտնվում են սոցիալապես ծանր վիճակում։ Սայիդա Պողոսյանն ընկերների աջակցությամբ այս օրերին փորձում է միջոցներ հայթայթել՝ արցախցի սոցանապահով ընտանիքների երեխաների ամանորյա երազանքն իրականություն դարձնելու համար։ Հայաստանի տարբեր մարզերից նամակներ ու աջակցության հայտեր են ստացվում, երեխաները տաք հագուստ, կոշիկ, սնունդ ու նվերներ են խնդրում։

Կան երեխաներ, ովքեր առողջական, տեսողական, շարժողական եւ այլ լուրջ խնդիրներ ունեն եւ Ձմեռ պապիկից խնդրել են ոչ թե խաղալիքներ, այլ օպտիկական ակնոցներ, դեղեր, բժշկական պարագաներ։ «Այս նամակները կարդալիս ես բառացիորեն կորցրել էի խոսելու ունակությունս։ Հավատացեք՝ այս երեխաների մանկությունը զրկված է անհոգությունից, այն ծանրաբեռնված է հոգսերով, ցավով ու խնդիրներով»,- ասում է Սայիդա Պողոսյանը։

Step1.am-ի հետ զրույցում նա նշեց, որ ցավոք, արցախցիները դեռեւս ունեն չլուծված հարցեր, կարիքները շատ են։ «Մեկ շաբաթում 1700-ից ավելի կարիքների հայտ է լրացվել, այդ թվում են շատ երեխաներ, ովքեր ակնկալիք ունեն Ձմեռ պապիկից ամանորյա նվերներ ստանալու։ Ինձ համար էլ է անընդունելի, որ երեխան Ձմեռ պապիկից սպասում է տաք հագուստ, կոշիկ, բայց քանի որ իրենք բնակվում են մարզերում՝ սահմանամերձ գյուղերում, մենք ընտրել ենք երեխաներին եւ փորձելու ենք անել անհնարինը, որ նրանք կարողանան Ամանորը դիմավորել նոր հագուստով ու նոր հույսով»,- ասաց Սայիդա Պողոսյանը։

Նա նշում է, արցախցիների շրջանում դեռեւս մեծ է գործազրկության ցուցանիշը։ «Ես ձեզ օրինակ բերեմ, արցախցիներից մեկը, որը լավագույն զինվորականներից է, ընդունել է ՀՀ քաղաքացիություն, որպեսզի աշխատանքի անցնի պետական համակարգում, բայց իրեն չեն ընդունում։ Եվ այս պահին դատական գործընթաց կա այդ հարցով, թե ինչու լավագույն մասնագետին աշխատանքի չեն ընդունում Պաշտպանության նախարարությունում։ Այսինքն՝ դեռ խտրական վերաբերմունքը շարունակվում է, եւ այս ամենը բերում է նրան, որ մի օր պետք է արթանանք ու տեր կանգնենք մեր իրավունքներին»,- ասաց նա։

Սոցանապահով արցախցի ընտանիքներին աջակցելու հարցում Սայիդա Պողոսյանին օգնում են բազմաթիվ մարդիկ․ «Ամեն տարի իմ ընկերներն են նախաձեռնության հիքմում կանգնած եղել։ Այս տարի էլ աշխարհի տարբեր երկրներից կրկին ընկերներս են աջակցում եւ Հայաստանում ապրող շատ հայրենակիցներ, ովքեր 2020 թվականից այս նախաձեռնության հիմքում կանգնած են։ Այստեղ հայն է, ով անտարբեր չէ իր հայրենկացի նկատմամբ»։

Սայիդա Պողոսյանը նաեւ տեղեկացնում է, որ հավատարիմ մնալով նախորդ տարվա ոգեշնչող ավանդույթին՝ այս տարի եւս հայտարարում են «1000 ընկեր-1000 դրամ» գաղափարի շուրջ միավորման մասին։ «Յուրաքանչյուրիդ անձնազոհ աջակցությունը հնարավորություն է ընձեռում, որ գալիք հրաշալի տոնին մեր փոքրիկն ապահովենք ձմեռային տաք հագուստով եւ կոշիկներով»,- նշում է նա։

Ովքեր ցանկանում են օգնել, գործում են հետեւյալ հաշվեհամարները՝

IDram 077207219

4318 2700 0055 6090

IDBank

4083 0600 1534 0876

AmeriaBank

Sayida Poghosyan

5454 7900 0066 2235

Converse Bank EUR

4847 0300 0012 4962

Converse Bank AMD

19300918737101 USD

Converse Bank

Converse Bank RUB

19300077594358